د بریتانیا هېواد د مالوماتو د څار ادارې ویلي چې ټیک ټاک د ماشومانو د محرمیت په ساتنه کې د پاتې راتلو له امله ۱۲٫۷ ملیون پونډه جریمه شوی

دا په داسې حال کې ده چې پر دغه ټولنیزه رسنۍ په نړیواله کچه محدودیتونه او بنديزونه ډېرېدونکي دي. استرالیا هم د ګڼو اروپايي او لویدیځو په څېر په حکومتي وسایلو کې د امنيتي اندېښنو له امله پر دغه ټولنيز اپلېکېشن بندیز ولګاوه.

افغانستان او پاکستان هم د هغو هېوادونو په کتار کې دي چې پر دغه اپلېکېشن يې پخوا لا بندیز لګولی.

د بریتانیا د مالوماتو د کمیشنر دفتر (ICO) په یوه څېړنه کې موندلې چې د ویډیو شریکولو اپ یا کاریال ټیک‌ ټاک د ډېټا یا د مالوماتو د ساتنې قانون مات کړی. دغه بنسټ ویلي د جريمې وړ دا سرغړونې د ۲۰۱۸ د مې او د ۲۰۲۰ د جولای تر منځ شوې.

که څه هم ټيک ټاک وايي، د ICO له دې پریکړې سره موافق نه دي.

دا یو له هغو درنو جریمو ده چې د برېتانیا هېواد د مالوماتو د کمېشنر بنسټ تر اوسه لګولې ده

بلخوا نوموړې څارونکې اداره وايي دا لاهم د هغه څه نیمایي ده چې ICO يې تېر کال پر ټیک ټاک د اېښودلو ګواښ کړی و.

د تېر ۲۰۲۲ زیږيديز کال په سپتمبر میاشت کې، د مالوماتو د خونديتوب دغه څارونکي بنسټ ټیک ټاک ته د «ارادې خبرداری» یاد احتمالي جریمې په اړه مخکې خبرداری هم ورکړی و.

د برېتانیا د مالوماتو د کمیشنر دفتر اټکل کوي چې TikTok په ۲۰۲۰ ميلادي کال کې د برېتانیا تر ۱٫۴ ملیونه پورې له دیارلسو کلونو ټيټ عمره ماشومانو ته د دغه اپلېکېشن د کارولو اجازه ورکړې وه، په داسې حال کې چې خپل قانون يې هم داسې دی چې د دغه عمر ماشومانو ته د حساب جوړولو اجازه نه ورکوي.

نور ولولئ: د ټیک ټاک نوی مشر شو زي چیو څومره پيژنئ؟

د انګلستان د مالوماتو د خونديتوب قانون وايي هغه پلټ فارمونه چې شخصي مالومات کاروي کله چې د ۱۳ څخه کم عمر ماشومانو ته مالومات وړاندې کوي باید د میندو او پلرونو خوښه یا رضایت ولري.

په افغانستان کې اوس مهال د ټيک ټاک کارول په قانوني توګه بند دي خو ډېری خلک يې د VPN له لارې ګوري.

په ټيک ټاک چينايي اپ دا تور هم دی چې د خلکو محرم مالومات له ځينو ادارو سره شريکوي هغه څه چې د دغه اپ جوړونکي او مشران يې ردوي.