بغداد کې لاریون کوونکو د سویډن پر سفارت هجوم ور وړی
![skynews protest baghdad iraq 6223970](https://afghannow.net/wp-content/uploads/2023/07/skynews-protest-baghdad-iraq_6223970-348x196.jpg)
پلازمېنه بغداد کې سلګونو لاریونکوونکو د سویډن پر سفارت هجوم ور وړی او اور یې ورته کړی دی
دا قهرېدلی لاریون د قرآن کریم سوځولو په غبرګون کې وشو چې څور ورځې وړاندې یو کس په سویډن کې دغه ناوړه عمل تر سره کړ.
عراق کې سلګونه لاریون کوونکو سویډن کې د قرانکریم سوځولو په غبرګون کې د دغه هېواد په پلازمېنه بغداد کې د سویډن سفارت ته اور اچولی دی.
قهرېدلو لاریونوالو سفار ته زیان اړولی
قهرجنو لاریون کوونکو نن پنجشنبه د جولای ۲۰مه بغداد کې د سویډن پر سفارت برید وکړ، دیوالونه یې ونړول او ځینو برخو ته اور ورته کړی دی. دغو لاریون کوونکو د سفارت ودانۍ ته زیان رسولی، خو د سویډن بهرنیو چارو وزارت خپل دیپلوماتان خوندي بولي.
نړیوالو رسنیو د سویډن د بهرنیو چارو وزیر توبیاس بیلستروم له قوله راپور ورکړی چې د سفارت کارکوونکي خوندي دي، خو عراقي چارواکي یې د سفارت خوندي ساتلو کې پاتې بللې دي.
نور ولولئ: مذهبي مقدساتو ته د سپکاوي مخنیوي طرحه تصویب شوه
د سویډن د بهرنیو چارو وزیر په یوه بیان کې ویلي: «هغه څه چې پېښ شوي، په بشپړه توګه د منلو وړ نه دي او حکومت دا بریدونه په کلکو ټکو غندي. حکومت د عراق لوړپوړو چارواکو سره په اړیکه کې دی.»
د بهرنیو چارو یاد وزیر زیاتوي چې عراقي ځواکونو ونه شو کولی تر څو دغه دیپلوماتیکه سیمه خوندي او د لاریون کوونکو د هجوم مخه ونیسي.
دغه لاریون د اهل تشیع مذهبي مشر رهبري کړی
د سکای نیوز د راپور پر بنسټ داسې ښودل کېږي چې دغه لاریون عراق کې شیعه مذهبي مشر مقتدي الصدر په غوښتنه د نوموړي د پلویانو له لوري سویډن کې د قرانکریم د سوځولو په غبرګون کې رابلل شوی و، خو په وروستیو شیبو دغه لاریون توند غبرګون وښود او پر دغه دیپلوماتیکه ساحه یې هجوم ور وړ.
په راپورونو کې ویل شوي چې لاریون کوونکي ډېر قهرېدلي تر سفارته ورسېدل، خو مخکې له دې چې د سفارت کارکوونکو او دیپلوماتانو ته کوم زیان ورسوي، نو هغوی خوندي ځایونو ته انتقال شوي او کوم زیان ورته نه دی رسېدلی.
نور ولولئ: د راسموس پالودان د قرآن سوځولو پر ضد لاریونونه روان دي
په دې لاریون کې سفارت ته اور اچول شوی او دیوالونو یې هم زیان لیدلی دی. د سويډن د بهرنیو چارو وزارت وايي چې عراقي ځواکونو باید زموږ د سفارت ساتنه وکړي څو په راتلونکې کې بیا داسې پېښه رامنځته نه شي.
دا څووم ځل دی چې سویډن کې د اسلام مبارک دین مقدساتو ته سپکاوی کېږي او په نړۍ کې د مسلمانانو غبرګونونه راپاروي.