ترېډز هغه نوی اپلیکشن دی چې له ټویټر سره د سیالۍ لپاره رامنځته شوی او په فعالیت کې پیل وکړ
د فېسبوک او انسټاګرام ملکیت لرونکي شرکت میټا مشر مارک زوکربرګ وايي، د دوی شرکت له لوري نوی پیل شوی پیغامیز اپلکېشن ترېډز به له خواله رسنۍ ټویټر سره په سیالۍ کې مخکې شي.
ماهرین وايي، دا نوی اپلکېشن ښايي د ټویټر هغو کاروونکو پام ځانته کړي، چې په ټویټر کې له وروستیو بدلونونو خوښ نه دي.
یاد اپلیکشن د اروپایي ټولنې غړو هېوادونو کې نشته
ترېډز تر اوسه د اروپايي ټولنې په غړو هېوادونو کې نه دی پیل شوی، کاروونکو ته په یوه پیغام کې د ۵۰۰ کلیمو لیکلو اجازه ورکوي او د ټویټر په څېر ګڼې ځانګړنې لري.
ښاغلی زوکربرګ وايي له پیل ایله څلور ساعته وروسته د هغو کسانو شمېر له پنځو میلیونو اوښتی، چې د دې اپلکېشن کارول یې پیل کړي دي.
نور ولولئ: د فیسبوک او ټویټر تر منځ تازه سیالي
له دې مخکې له نوموړي پوښتنه وشوه چې ایا دوی هوډ لري چې دا اپلکېشن به ”د ټویټر پرتله هم لوی ” وي، نوموړي وویل: ”دا به یو څه وخت واخلي، خو زه فکر کوم د خلکو بحث لپاره داسې ولسي اپلکېشن باید وي، چې د کاروونکو شمېر یې له یو میلیارد کسانو زیات وي. ټویټر دا فرصت درلود، چې همدومره خلک ولري، ویې نه ساتل، هیله من یو موږ به یې وساتو. ”
ترېډز اپلکیشن په سلو هېوادونو کې کار کوي
د بریتانیا په ګډون په نژدې ۱۰۰ هېوادونو کې همدا اوس دا اپلکېشن عملاً کارول کېږي، خو د انتظامي اندېښنو له کبله تر اوسه پورې د اروپايي ټولنې په غړو هېوادونو کې د دې اپلیکشن پیل نه دی شوی.
میټا شرکت چې د فېسبوک، انسټاګرام ملکیت لري، د تریډز اپلېکېشن اوسنۍ بڼه ”لومړنۍ ”هغه بولي او په وینا یې په راتلونکي کې به نورې اسانتیاوې هم پکې رامنځته کړې، چې د ماستوډون په ګډون به د نورو خواله رسنیو اپلکېشنونو له کاروونکو سره اړیکه نیول هم پکې شامل دي.
دا په داسې حال کې دې چې په دې وروستیو کې د چټجيپيټي په څېر تکنالوژي کې بې ساری پرمختګ راغلی او په نږدې راتلونکې کې به نور خارقالعاده نوښتونه هم په کې راشي.
