خوست کې د سرو زرو کان د استخراج تړون لاسلیک شو؛ له ۸۰۲ میلیونه افغانیو ډېره پانګونه کېږي
د افغانستان د کانونو او پټرولیم وزارت اعلان کړی چې خوست کې د سرو زرو کان د استخراج قرارداد یې له یوې خصوصي کمپنۍ سره لاسلیک کړی دی. د وزارت په وینا، دا پروژه به د خوست ولایت د شمل ولسوالۍ د سورکڼي سیمې په کان کې عملي شي او له ۸۰۲ میلیونه افغانیو څخه زیاته پانګونه به پرې وشي.
د وزارت د معلوماتو له مخې، د کانونو او پټرولیم وزیر ملا هدایتالله بدري د «جاوېد خان نیازي د کانونو او پروسس سوداګریز شرکت» له مسوولانو سره د یاد کان د استخراج تړون لاسلیک کړی دی.
په پروژه کې د سلګونو میلیونو افغانیو پانګونه
د چارواکو په وینا، د خوست کې د سرو زرو کان د استخراج لپاره به ټولټال ۸۰۲ میلیونه او ۴۷۶ زره افغانۍ پانګونه وشي. دغه قرارداد د پنځو کلونو لپاره ورکړل شوی او شرکت به د ټاکل شوې مودې په ترڅ کې د کان د استخراج چارې پر مخ وړي.
ملا هدایتالله بدري ویلي چې د کان مساحت ۰.۶۱۸۵۰۳ مربع کیلومتره دی او د تړون له مخې به د سیمې د اوسېدونکو لپاره په ټولنیزو او عامه خدمتونو کې هم لازمې همکارۍ ترسره شي.
دولت به ۶۰ سلنه ونډه ولري
د کانونو او پټرولیم وزارت ویلي چې دولت به د یاد کان له عوایدو او فعالیتونو څخه ۶۰ سلنه ونډه ترلاسه کوي.
بلخوا، د جاوېد خان نیازي د کانونو او پروسس شرکت مسوولانو ژمنه کړې چې د قرارداد ټول شرایط به په شفاف ډول او د ټاکل شوي مهالوېش له مخې عملي کړي.
کارپوهان باور لري چې د خوست کې د سرو زرو کان استخراج کولی شي د کانونو په سکټور کې پانګونې ته وده ورکړي، د کارموندنې فرصتونه زیات کړي او د هېواد د عوایدو په لوړولو کې مهم رول ولوبوي.
