د احمدشاه بابا کور او مقبره او د میرویس نیکه مقبره رغول کېږي
![img 20230524 152806 621](https://afghannow.net/wp-content/uploads/2023/10/IMG_20230524_152806_621-348x196.jpg)
د طالبانو د اطلاعاتو او کلتور وزارت وايي چې د یادو تاریخي آبداتو د بیارغونې چارې پیلوي
له تېرو څو کلونو راهیسې د کندهار او نورو سیمو فرهنګي څېرو او نورو مخکښو کسانو بار بار له دولت غوښتي و چې تاسو باید د احمدشاه بابا د کور د نړېدو مخنیوی وکړی او له سره یې ورغوی، خو تر اوسه پوره دې غوښتنې ته مثبت ځواب نه دی ویل شوی او تر څو چې یاد ځایونه ونه رغول شي، تر هغو د فرهنګیانو او قلموالو قناعت نه تر لاسه کېږي.
نور ولولئ: نوروز په افغانستان کې د يوې فرهنګي ورځې په توګه هر کال لمانځل کيږي
اوس طالبان وايي چې دوی یې د بیارغونې چارې پیل کړي دي.
د یادو تاریخي آبداتو د رغونې د چارو رسما پیل
د طالبانو د اطلاعاتو او کلتور وزارت سرپرست ملا خيرالله خیرخواه په کندهار کې د درېیو تاریخي آبدو (میرویس خان نیکه د مقبرې، د لوی ټولواک احمدشاه بابا کور او مقبرې) د بیارغونې چارې رسماً پیل کړې.
په دې غونډه کې ملا خيرالله خیرخواه وویل، د دوی حکومت د تاریخي اثارو ساتنې ته پوره ژمن دی.
نوموړي زیاته کړه احمدشاه بابا او میرویس خان نیکه زموږ هغه اتلان دي، چې تر اوسه د افغانانو زړونو کې ځانګړی ځای لري، دوی د بهرنيو یرغلګرو په ماتولو افغانانو ته زرین تاریخ پرېیښی.
طالبان په هېواد کې د نورو تاریخي آبداتو د ساتنې ژمنې هم ورکوي
خیرخواه همداراز وویل، چې د هېواد په بېلابېلو ولایتونو کې د تاریخي اثارو بیارغونه شوې ده، پر ځینو عملاً د بیارغونې کار جریان لري او پر ځینو به په راتلونکي کې پیل شي.
طالب چارواکو د دغو آبدو د بیارغونې په اړه نور جزییات نه دي ورکړي.
نور ولولئ: په میدان وردګ کې د «مڼې ګل» دودیزه مشاعره وشوه
د طالبانو له بیا واکمنیدو سره د دوی د تېرې واکمنۍ برعکس، فرهنګي او تاریخي ارزښتونو ته پاملرنه کیږي.
طالبان په داسې حال کې د تاریخي ځایونو د ساتنې ژمنې کوي چې ۲۵ کاله وړاندې همدې ډلې د بامیانو شمامه او سالسال تاریخي مجسمې په ټانکونو ویجاړې کړې او تر څنګ یې نورو ځایونو کې هغه ځایونه ونړول چې دوی دغه سیمې د کفارو پاتې شونې ځایونه او حرام بلل، خو اوس دوهم ځل واک ته په رسېدو دغه ډله وايي چې دوی به له دې وروسته تاریخي ځایونه ساتي او پام به ورته کوي.
څو ورځې وړاندې استاد مزمل په یوه غونډه کې وویل چې طالبان لا هم په طالبي ادبیاتو کې ښکېل دي او دغه ادبیات باید پرېږدي او د ملت ارزښتونو ته وروګرځي.