دغه قیمتي ډبرې ایران ته په قاچاقي لارو وړل کېږي او هلته بیا په ارزانه بیه پلورل کېږي
د ایران د سوداګرۍ خونې مرستیال وايي، له افغانستانه اېستل شوې قیمتي ډبرې له قاچاقي لارو ایران ته واردېږي او د ایران په بازارونو کې پلورل کېږي.
قدیر قیافه، ایلنا خبري اژانس ته وویل، «د دغو ډبرو استخراج د ایران او افغانستان ترمنځ د همکارۍ نښه کېدای شي.»
د ایلنا خبري اژانس د راپور له مخې قدیر قیافه د یک شنبې په ورځ د (غوايي ۲۳مه) د افغانستان په کانونو کې د ایران پر پانګونې ټینګار کړی دی.
د افغانستان بازارونو ته د ایران هڅه
د ایران د سوداګرۍ خونې مرستیال وايي، په افغانستان کې پانګونه د ایراني پانګوالو لپاره ګټوره تمامېدای شي.
ورته مهال نوموړي ویلي؛ د ایران د کانونو څو لویو شرکتونو د افغانستان کانونو ته د ننوتلو په موخه یوه تګلاره جوړه کړي او د ایران د فولادو یوه لویه کمپنۍ هم د افغانستان د کانونو بازار ته د ننوتلو لپاره جدي تصمیم نیسي.
نور ولولئ: د افغانستان سرپل ولایت کې هره ورځ د ۹۰۰ټنه نفتو استخراج
نور ولولئ: شهاب الدین دلاور: چنايي شرکت ته هله کانونه ورکوو چې افغانستان کې پروسس وکړي
د قدیر قیافه د څرګندونو له مخې، په تېرو څو کلونو کې د ایران او افغانستان تر منځ د کانونو پر موضوع باندې خبرې اترې او په تګ راتګ تمرکز شوی دی.
په افغانستان کې بانکي ستونزې
خو د ایران د سوداګرۍ خونې مرستیال وايي چې په دې هېواد کې داسې بانک نشته چې له پولې هاخوا له ۴۰۰ څخه تر ۵۰۰ میلیونو ډالرو پورې د ایران سره د پروژو مالي ملاتړ وکړي او په ایران کې د کانونو د سوداګرۍ د خاوندانو ملاتړ وکړي.
د خراسان ولایت د اقتصادي چارو د همغږي کوونکي مرستیال حسن نوريزاده هم د غوايي په ۱۹مه وویل چې ټول کانونه په افغانستان کې موجوددي او دا د ایران لپاره یو ښه فرصت دی.
دا په داسې حال کې ده چې د ۱۴۰۲ کال د تلې په میاشت کې د خراسان د والي اقتصادي مرستیال ابوالفضل چمندي رضوي طالبانو ته وړاندیز وکړ چې د افغانستان د کانونو د سپړلو لپاره دې یو ګډ شرکت جوړ کړي.
پر دې سربېره، ځینې کارپوهان وايي چې د افغانستان د کانونو کېدنه په نامسلکي ډول روانه ده. دوی زیاتوي چې که دغه حالت دوام وکړي نو څو کاله وروسته به د افغانستان کانونه په ډېره کمه بیه تللي وي او دغه هېواد به له زیربنا او معادنو خلاص وي.
