اړوند خبرونه:
د ترکیې د بهرنیو چارو وزیر وايي، سوریه یوازې نه پرېږدي
ابو محمد جولاني: موږ نه غواړو چې سوریه د افغانستان په څېر شي
د سوریې د موقت ولسمشر میرمن «لطیفه الدروبي» د وري له ۲۲مې څخه تر ۲۳مې پورې په ترکیه کې د “انتالیا ډیپلوماسۍ کنفرانس” په څلورم پړاو کې ګډون وکړ او د کنفرانس په څنډه کې یې د ترکیې له لومړۍ میرمنې، «امینه اردوغان» سره یې وکتل.
دې غونډه کې د بېلابېلو هېوادونو لوړ پوړو چارواکو، ډیپلوماتانو او سیاسي شخصیتونو پکې ګډون کړی و، د سیمهییزې همکارۍ د پیاوړتیا او د نړیوالو مسلو په اړه د بحث لپاره فرصت برابر کړ، خو په کنفرانس کې د سوریې د لومړۍ میرمنې حیرانونکې حضور د عربي رسنیو پام ځانته راواړاوه.
لطیفه الدروبي پخوا به په عامه محضر کې ډېره نه راڅرګندېده او ډېری وخت به یې د رسمي غونډو لپاره اوږدې تورې عربي جامې اغوستې وې، د انتالیا په نړیوال کنفرانس کې د خپل ترکي سیال په څېر یو بل لباس اغوستی و.
د ترکیې لومړۍ میرمنې د میرمن الدروبي سره له کتنې وروسته ولیکل چې “د سوریې د عربي جمهوریت د محترمې لومړۍ میرمنې لطیفه الدروبي سره په خبرواترو کې، موږ د سوریې د ښځو او ماشومانو د ژوند د ښه کولو لپاره د ګډو پروژو په اړه بحث وکړ. زه هیله لرم چې دا ګامونه به په سیمه کې د تلپاتې سولې او ثبات لامل شي.”
عربي رسنیو راپور ورکړی چې د انتالیا په ډیپلوماسۍ کنفرانس کې د سوریې د لومړۍ میرمنې شتون د سوریې د لنډمهاله ولسمشر په توګه د احمد الشرع له ټاکل کېدو وروسته په یوه نړیواله غونډه کې د هغې لومړۍ رسمي څرګندونه ده.
لطیفه الدروبي، پخوا ډېره کمه په عام محضر کې راڅرګنده شوې وه، په دې وروستیو کې یې د خپل خاوند سره یوځای د خپل ډیر څرګند شتون سره د رسنیو پام ځانته اړولی دی. هغه په ۱۹۸۴ کال کې د حمص په ښار کې زېږېدلې، او د دروبي له یوې مشهورې کورنۍ څخه ده. هغه په عربي ژبه او ادب کې ماسټري لري او د دریو زامنو مور ده.
د لطیفه الدروبي شتون په عامه سټیجونو کې، په ځانګړې توګه په نړیوالو پیښو کې، د احمد الشرع په چلند کې د پخوا په پرتله بدلون ښیي. الشرع، پخوا د ابو محمد الجولاني په نوم پیژندل کېده او د تحریر الشام ډلې مشر و، په وروستیو کلونو کې هڅه کړې چې یو ډېر معتدل انځور وړاندې کړي.
په رسمي سفرونو کې د خپل خاوند سره یوځای کېدل او د سوریې د لومړۍ میرمنې په توګه یې معرفي کول د سوریې د انتقالي حکومت د عصري او متوازن انځور د انځورولو لپاره د دې هڅې یوه برخه ګڼل کیږي. احمد الشرع مخکې اعلان کړی و چې د هغه حکومت به په ښځو باندې اجباري حجاب او ټولنیز محدودیتونه نه لګوي، او د لطیفه الدروبي شتون، په دودیز ډول خو په ازاده توګه جامې یې اغوستې وې، د هغه په څنګ کې دا دریځ پیاوړی کړ.
