سره له دې چې انجلینا جولي ۴۷ کلنه شوه، خو لا هم ځوانه او ښکلا یې مشهوره ده

له نن څخه ۴۷ کاله پخوا د ۱۹۷۵ د جون په ۴ مه نامتو امریکايي سینمايي ستورې او بشرپاله انجلینا جولي ( Angelina Jolie) د کلیفورنیا ایالت په لاس انجلس ښار کې وزېږېده.

دغه ستوري په فلمي نړۍ کې ډېره ځلېدلي ده او له همدې امله انجلینا جولي ګڼې جایزې لکه اسکر، د ګولډن ګلوب ۳ جایزې او ډېر نور میډالونه ګټلي دي. جولي د خپل ژوند په اږدو کې داسې هنري هڅې کړي چې له امله یې په نړۍ کې خورا مشهوره څېره ده.

نور ولولئ: انجلینا افغان ښځو ته: زه ستاسې په مقاومت او قدرت باور لرم

جولي، چې کله په فلمونو کې کار کاوه څو ځلې تر ټولو د ډیرې اجورې ترلاسه کوونکې ستورې اعلان شوه.

په فلمونو کې د هغې د کار پیل

دا لا ماشومه وه چې له خپل پلار جان ویټ سره یې په ۱۹۸۲ م کال په فلم کې کار وکړ خو یوه لسیزه وروسته په ۱۹۹۳م کال په سایبرک ۲ فلم کې په کار کولو په مسلکي ډول سینما ته مخه کړه.

هغې په ۱۹۹۵ کال د هکرانو په فلم کې د اتلې یا اصلي لوبغاړې په توګه رول ولوباوه، په ۱۹۹۷ کې یې د جورج والس او په ۱۹۹۸ کال د ویجیا د ژوندلیکونو په فلمونو کې رول لوبولی دی. جولي په ۱۹۹۹ کال د پاشل شوې نجلۍ په ډرامه کې تر ټولو د غوره ښځینه لوبغاړې په خاطر د اسکر جایزه وګټله.

جولي له فلم او هنر ورهاخوا

جولي پر هنري او فلمي کارونو سربېره د بشرپالو کارونو په خاطر ډېره مشهوره ده. هغې په نړۍ کې د مېرمنو او ماشومانو د حقوقو په برخه کې مبارزه کړې ده. دا د ملګرو ملتونو د لویې کمیشنرۍ ځانګړې استازې ټاکل شوې، د افغانستان په شمول یې د نړۍ دوولسو هیوادونو ته د کډوالو د وضعیت د کتلو لپاره سفرونه کړي دي.

ډېر ولولئ: انجلینا جولي د پخواني مېړه سره ملاقات رد کړ

اغلې جولي د امریکا د تفریحي صنعت تر ټولو اغېزمنه څېرمه پېژندل شوې او بېلابېلو رسنیو څو کاله دا د نړۍ تر ټولو ښکلې ښځه نومولې ده. د جولي له ښکلا څخه د نړۍ ډېر مشهور هنرمندان او سیاسي څېرې هم اغېزمنې دي. جولي له څو کسانو طلاق اخیستی او له څو سره یې واده کړی دی چې ځینې یې دادي لکه: هغې له جاني لي میلر، بیلي باب تورنټن او براد پیټ سره ودونه کړي او جلا شوې ده چې له پیټ څخه ۶ اولادونه لري.