طالبانو د باغدارې بند د سروې قرارداد له یوه چینايي شرکت سره لاسلیک کړ
د طالبانو تر ادارې لاندې د اوبو او انرژۍ وزارت د کابل شمال ته په کاپیسا ولایت کې د باغدرې بند لپاره د امکان سنجونې د مطالعاتو د ترسره کولو لپاره د مس عینک د مسو کان له چینايي قراردادي شرکت سره قرارداد لاسلیک کړ.
دغه قرارداد چې د طالبانو د اوبو او انرژۍ وزیر عبداللطیف منصور او د چینايي قراردادي شرکت رئیس سن ونبینګ لاسلیک کړ، د بند لپاره جیوفزیکي او جیوتخنیکي مطالعات رانغاړي.
د افغانستان او چین مهم شراکت
د طالبانو تر ادارې لاندې ملي تلویزیون د راپور له مخې، منصور دغه پروژه د افغانستان او چین ترمنځ د همکارۍ په برخه کې “یو مهم پرمختګ” وباله.
هغه د لاسلیک د مراسمو پر مهال وویل: “دا پروژه به د افغانستان او چین ترمنځ د شراکت یو مهم پړاو وي.”
نور ولولئ: د اوبو او برېښنا وزیر ریسانو سره تعرفي ناسته وکړه
نور ولولئ: ملا برادر اخوند: موږ به ګاونډیانو ته د افغانستان بهېدونکي اوبه مهار کړو
د قرارداد له مخې، چینايي شرکت ژمنه کړې چې د اوبو او انرژۍ د وزارت په همکارۍ به د امکان سنجونې او تخنیکي ارزونو کارونه په اته میاشتو کې بشپړ کړي.
طالبانو د باغدرې بند د پروژې مالي ارزښت نه دی څرګند کړی، او د دوی تر ادارې لاندې په افغانستان کې د پرمختیايي پروژو لپاره د مالي تمویل جزئیات هم مبهم پاتې دي.
په افغانستان کې د پروژو تر لاسه کولو کې د چین لېوالتیا
چین په افغانستان کې هڅه کوي چې د طالبانو د رژیم په موجودیت او د اساسي قانون په خلا کې د افغانستان زیربیناوو ته لاسرسی پیدا کړي او د خپل اقتصاد د ستنو لا قوي کولو لپاره ترې ګټه پورته کړي.
چین له طالبانو سره د ښو اړیکې پاللو له مخې هڅه کوي چې د افغانستان معادنونو او لیتیومو ته ځان ورسوي او په زیاتو برخو کې بریالی شوی هم دی.
کارپوهان وايي، که طالبانو له چین سره د قراردادونو په کولو کې احتیاط ونه کړي، نو کېدای شي، د افغانستان منابع په نه بیه له لاسه ووځي.
په ۲۰۱۶ کال کې د افغانستان د پخواني حکومت چارواکو د دې بند د جوړولو لګښت شاوخوا ۵۶۰ میلیون ډالره اټکل کړی و، چې تمه وه د نړیوال بانک له لوري تمویل شي. خو دغه پروژه د پلان جوړونې له مرحلې وړاندې پرمخ نه لاړه.
د کانونو وزارت د معلوماتو له مخې، دغه بند چې د پنجشیر او غوربند پر سیندونو جوړېږي، له ۲۵۰ څخه تر ۳۰۰ میګاواټه پورې د بریښنا د تولیدولو لپاره ډیزاین شوی و.
