د بامیانو د طالبانو والي وايي چې دوی به د ښځو لپاره بند امیر کې ځانګړی پارک جوړ کړي
ملي پارک بند امیر د افغانستان مرکزي ولایت بامیان کې دی او له مهمو تفریحي سیمو بلل کېږي.
بند امیر ته هر کال لسګونه زره کسان لیدو ته ورځي او هلته مېلې کوي.
نور ولولئ: د بشري حقوقو د څار سازمان بند امیر ته د ښځو پر تګ بندیز غندلی
د طالبانو په واکمنېدا سره دغې سیمې ته د ورتلونکو کسانو شمېر لا ډېر شوی، خو څه موده وړاندې دې سیمې ته وروسته له هغه لا ډېر پام واوښت چې د طالبانو د امر بالمعروف او نهي عن المنکر وزیر وویل ښځې دده په وینا د حجاب نه مراعاتولو له کبله له دې وروسته دغې سیمې ته نه شي ورتلی.
د طالبانو دې عمل ته د نړیوالو غبرګون
د طالبانو دې پرېکړې په کور د ننه او بهر غبرګونونه پارولي وو، خو د بامیانو لپاره د طالبانو ګومارل شوي چارسمبالي والي عبدالله سرحدي تازه څرګندونو کې له دولتي تلوېزیون سره مرکه کې ویلي، غواړي راتلونکی کال د بند امیر یوه برخه کې د ښځو لپاره ځانګړی پارک جوړ کړي.
پارک کې به ټولې کار کوونکې ښځې وي
له هغه راهیسې چې طالبان بیا واک ته رسېدلي، پر ښځو یې د کار، ټولنیزو فعالیتونو او د زدکړې برخه کې یو لړ محدودیتونه لګولي.
له دې وړاندې یې کابل او نورو ولایتونو کې پارکونو، سینګارتونونو، لوبیزو ځایونو او حمامونو ته د ښځو پر تګ بندیز لګولی.
د طالبانو دې کړنو پراخ غبرګونونه پارولي او دا ډول کړنې یې د بشري حقونو ضد بلل شوې دي، خو طالبان وايي د شریعت په رڼا کې د ښځو حقونو ته ژمن دي.
نور ولولئ: بامیانو ته په تېر یو کال کې څومره سیلانیان راغلي؟
خو پر دې سربېره طالبان د ښځو پر وړاندې داسې دریځ غوره کړی چې د شنونکي په نظر مېرمنې یې له ټولنې نفې کړي او حقوق یې تر پښو لاندې شوي دي.
نړیوال بنسټونه او افغانان له طالبانو غواړي چې د ښځو پر وړاندې پوهنتونونه او پوهنځي پرانیزي، خو طالبانو تر اوسه د دوی غوښتنو ته مثبت ځواب نه دی ویلی او د دوی غوښتنې يې له پامه غورځولي چې په دې سره طالبان هم له ګڼو فشارونو سره مخامخ دي او دننه د دوی په منځ کې هم په دې باندې اختلافات شته، خو خبره یې تر رسنیو نه راوځي.
