تحریک طالبان پاکستان د خیبرپښتونخوا بنو سیمه کې د پاکستان پر پوځي اډه لومړی موټر بم بریدونه وکړل او بیا دغه مرکز ته ننوتل
دغه برید نن (دوشنبه) سهار شاوخوا ۵ بجې شوی چې د دقیقو زیانونو په اړه یې لا هم جزیات نه دي خپاره شوي.
سیمه د پاکستاني پوځ له لوري کلابند ده او له پاسه پرې چورلکې ګزمې کوي.
جګړه لا هم روانه ده
له سیمې د افغانناو سرچینې وايي، نن سهار شاوخوا پنځه بجې د خیبرپښتونخوا په بنو کې د پاکستاني پوځ پر یوه مرکز ځانمرګي او وسله وال بریدونه شوي او لا هم جګړه روانه ده.
د لومړنیو معلوماتو له مخې، په دغه بریدونو کې څلور پاکستاني عسکر وژل شوي او د دوو عسکرو په ګډون نهه تنه ولسي خلک ټپیان دي.
خو په دې اړه د پاکستان پوځ کومه رسمي اعلامیه نه ده ورکړي.
نور ولولئ: د پاکستان دفاع وزیر: د ترهګرو په ځپلو کې طالبان راسره همکاري نه کوي
نور ولولئ: د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی
نور ولولئ: اسلام اباد له طالبانو د ټي ټي پي د له منځه وړلو غوښتنه وکړه
له سیمې کره سرچینې وايي، نن دوشنبه د (چنګاښ ۲۵مه) ويلي چې د خیبرپښتونخوا په بنو ولسوالۍ کې د پاکستاني پوځ پر یوه مرکز لومړی د موټربم دوه ځانمرګي بریدونه وشول او ورپسې نورو وسله والو بریدونه پیل کړل چې د لومړنیو معلوماتو له مخې په دغو بریدونو کې څلور پاکستاني پوځيان وژل شوي او دوه نور ټپیان دي.
عامو خلکو ته اوښتي زیانونه
د دې تر څنګ د ورڅېرمه کورونو او بازار کې هم د ښځو په ګډون اووه تنه ټپیان دی. دا د پیښې لومړۍ شیبې ښايي، د مرګ ژوبلې شمېرې لوړې شي.
په سیمه کې لا هم د ډزو غږونه اورېدل کېږي او جګړه روانه ده.
د پاکستان پوځ سیمه کلابند کړي ده او چاته اجازه نه ورکوي تر څو یادې سیمې ته داخل شي.
د بنو پر پوځي اډه برید د تحریک طالبان پاکستان یا ټي ټي پي لخوا شوی او پړه یې دوی پر غاړه اخیستې ده.
دا په داسې حال کې ده چې د پاکستان پوځ د ټي ټي پي او نورو وسله والو ډلو پر ضد د عزم استحکام په نوم عملیات پلان کړي او د تیارۍ چارې یې روانې دي.
په دې وروستیو کې په پاکستان کې بریدونه او ناامنۍ زیاتې شوي دي.
پاکستان کې د ناامنۍ له زیاتېدو سره بهرنۍ ډیپلوماټیکې استازولۍ هم په ویره کې دي چې له امله یې دوه ورځې وړاندې د کراچۍ له ښاره د جرمني ډیپلوماټان هم ووتل.
د هرې ورځې په تېرېدو په پاکستان کې بریدونه په زیاتېدو دي.
