۸صبح ورځپاڼه په خپل راپور کې وايي د طالبانو په زندانونو کې د دوو مېرمنو د «ناوړه روغتيايي وضعیت» خبر ورکوي
۸صبح، کابل: معترضو مېرمنو ژولیا پارسي او منیژې صدیقي ته نږدې سرچینې وايي چې دا دواړه مېرمنې د طالبانو په زندانونو کې له «ناوړه روغتیايي وضعیت» سره مخ دي.
نور ولولئ: د طالبانو غلطو تعلیمي تګلارو د زده کړو کیفیت زیانمن کړی
سرچينې د سېشنبې ورځ، د لیندۍ په ١٤مه، ٨صبح ورځپاڼې ته تاييد کړې چې منیژې صديقي د پلچرخي له زندانه خپلې کورنۍ سره اړیکه نیولې او په ژړا او چیغو يې د ځان ژغورنې لپاره د مرستې غوښتنه کړې ده.
د منیژې صدیقي مور هم په یوه ویډیویي کلېپ کې ویلي چې لور یې د مرګ له حالت سره مخ ده.
ژولیا پارسي د امنیت ریاست روغتون ته لېږدول شوي
په ورته وخت کې سرچینې همداراز د ژولیا پارسي د ناوړه روغتیايي وضعیت په اړه خبر ورکوي او وايي چې طالبانو تېره اوونۍ د «امنیت ریاست روغتون» ته لېږدولې وه.
د سرچينې د معلوماتو له مخې، طالبانو يوه اوونۍ وروسته دغه مېرمن د دې ډلې د استخباراتو د ۴۰ ریاست زندان ته لېږدولې ده.
نور ولولئ: د اګست ۱۵ د طالبانو د بیا واکمنېدو ورځ؛ معترضې ښځې خپل حقوق غواړي
دا مهال ندا پرواني او پریسا ازاده هم د طالبانو له لوري بندیان دي.
منیژه صديقي، ژولیا پارسي له خپل زوی او ندا پرواني له خپل خاوند او څلور کلن ماشوم سره له دوو مياشتو راهيسې د طالبانو په زندان کې دي او تر اوسه يې د برخليک په اړه معلومات نشته.
له کله چې طالبانو پر افغانستان واک تر لاسه کړ، د ښځو پر ازادۍ او حقونو يې سخت محدوديتونه لګولي او په بېلابېلو مواردو کې يې لاريون کوونکي ښځې نيولي، شکنجه او زنداني کړي دي.
د ښځو پر وړاندې د طالبانو تګلارې ځپونکي دي
د ښځو پر وړاندې د طالبانو تګلارې د ښځو د نابودۍ په خاطر دي او دا هغه کړنې دي چې د علماوو په وینا له اسلامي شریعت سره هېڅ اړخ نه لګوي.
طالبانو په خپله دوه کلنه دوره کې د ښځو پر وړاندې تر ټولو سخت محدودیتونه وضع کړي دي چې په دې د ښځو د زده کړو بندول او کار نه کول هم شامل دي. خو پر دې سربېره لا هم ښځې نیول کېږي او شکنجې ورکول کېږي.
