دغه غونډه وروسته له هغه د جاپان او متحده عربي اماراتو په غوښتنه راوبلل شوه چې ملګرو ملتونو وویل، په افغانستان کې د دې سازمان په اړوندو ادارو کې د ښځو د فعالیت مخنیوی شوی
د ملګرو ملتونو لخوا د دغې جوړې شوې غونډې جزییات او پایلې تر دې دمه نه دې ښکاره شوي خو مخکې ویل شوي وو چې د افغانستان لپاره د ملګرو ملتونو د بشري حقونو ځانګړی رپورټر او په افغانستان کې د ملګرو ملتونو سیاسي استازولۍ یوناما مشره روزه اوتنبایوا به غونډه کې خبرې کوي.
له دې مخکې وړمه ورځ په افغانستان کې د ملګرو ملتونو استازولۍ دفتر یوناما په یوه ټویټر پیغام کې وویل، په ننګرهار ولایت کې د دوی په دفتر کې د ښځینه کارکوونکو د فعالیت مخه نیول شوې ده.
یوناما د دې پرېکړې له کبله ”ژوره اندېښنه ” څرګنده کړه او د ملګرو ملتونو عمومي منشي انتونیو ګوتېرېش په دې هکله وویل چې د افغانستان په ننګرهار ولایت کې د خپلو افغان همکارانو د کار بندیز په سختو ټکو غندي.
نوموړي پر ټویټر لیکلي وو چې که له دې کاره لاس وانخیستل شي نو دا به اړمنو خلکو ته د ژوند ژغورونکو مرستو وړاندې کولو وړتیا کمزورې کړي.
د ملګرو ملتونو استازولۍ دفتر وايي چې پر طالبانو غږ کوي چې د ملګرو ملتونو سازمان مرکزونه له ښځینه کارکوونکو پرته نه شي کولای فعالیت وکړي او خپلې هغه مرستندویه چارې روانې وساتي چې د ژوند ژغورلو لامل کېږي.
په ورته مهال د اسلامي همکاریو سازمان د ملګرو ملتونو په دفترونو کې د ښځو فعالیت مخنیوي په تړاو ژوره خواشینې څرګنده کړې ده
د اسلامي همکاریو سازمان له طالبانو غوښتي چې پر خپلې دغې پرېکړې چې دوی وايي د منلو وړ نه ده، له سره غوره وکړي او نارینه او ښځینه افغانانو ته اجازه ورکړي، چې تر څو لسیزو جګړو او تاوتریخوالي وروسته د خپل هېواد په بیارغونه کې ونډه واخلي.
نور ولولئ: روسیې ته د امنیت شورا مشرۍ سپارل کېدو اوکراین غوسه کړی
طالب چارواکو تر دې دمه د دې دواړو سازمانونو غوښتنو ته ځواب نه دی ويلی.
د یادونې وړ ده چې دا نه يوازې د سازمانونو غوښتنه ده بلکې د افغانانو اکثريت غوښتنه هم ده.
