فریدون سینیرلي اوغلو وايي چې د دوحې په غونډه کې د افغانستان په تړاوړ مهمې پرېکړې کېدونکي دي
د افغانستان لپاره د ملګرو ملتونو ځانګړي همغږي کوونکي فریدون سینیرلي اوغلو د طالبانو د ریاست الوزرا له سیاسي مرستیال مولوي عبدالکبیر سره د دوحې د راتلونکې ناستې په اړه خبرې کړي.
د افغانستان په اړه د دوحې د ناستې په رانږدې کېدو سره د ملګرو ملتونو ځانګړی همغږی کوونکي فریدون سینیرلي اوغلو کابل کې دی او له لوړپوړو طالب چارواکو سره په خبرو بوخت دی.
له یادې غونډې د طالبانو تمې
که څه هم ملګرو ملتونو یا اوغلو د دې لیدنو د محتوا په اړه لا څه نه دي ویلي، خو د ارګ په خبرپاڼه کې د هغه په حواله لیکل شوي چې ډاډمن دی امریکا او اروپايي هېوادونه له طالبانو سره د اړیکو او همکاریو لېوالتیا لري.
هغه د دوحې ناستې ته په اشارې چې تمه ده د فبروري په اتلسمه او نولسمه په دوحه کې د ملګرو ملتونو په کوربه توب وشي ویلي چې تمه ده د افغانستان په تړاو پهکې ښې پرېکړې وشي.
نور ولولئ: د دوحې غونډه؛ د افغان ښځو او نجونو پر وضعیت بحثونه روان دي
نور ولولئ: طالبان د دوحې ناستې له اجنډا خبر نه لري
نور ولولئ: د افغانستان په تړاو د دوحې غونډې ته د حامد کرزي ګونګ پیغام
دا چې په دغو پرېکړو کې څه شامل دي د طالبانو په اعلامیه کې ترې یادونه نه ده شوې، خو د سینیرلي اوغلو په حواله راغلي چې د دوحې له کنفرانس وروسته به له افغانستان سره د نړۍ په اړیکو کې مثبت بدلونونه راشي.
له طالبانو سره د نړیوالې ټولنه اختیاط
د طالبانو له بیا واکمنېدو راهیسې نړیواله ټوله په راس کې امریکا او اروپايي ټولنه له طالبانو سره محتاطانه مخته ځي.
نړیواله ټولنه یواځې د اوونۍ څلوېښت میلیونو ډالرو مرسته د ملګرو ملتونو له بشري پروګرامونو سره کوي څو اړمنو افغانانو ته اړینې مرستې ورسوي.
له دې ور هاخوا ګڼې پراختیايي پروژې چې د امریکا او اروپايي ټولنې له خوا تموېلېده د طالبانو په بیا واکمنېدو بندې شوي.
په دې سربېره د نړۍ هېڅ یوه هېواد لا د طالبانو حکومت په رسمیت نه دی پېژندلی.
د دوحې تر کنفرانس مخکې د ملګرو ملتونو هغه پرېکړه چې تمه ده د افغانستان لپاره یو ځانګړی استازی وټاکي د طالبانو له مخالفت سره مخ شوی دی.
بل لور ته د افغانستان پخواني ولسمشر حامد کرزي د دوحې ناستې له ګډونوالو غوښتي چې د افغان نجونو زده کړو او ښځو ته د کار اجازه ورکولو زمینه برابره کړي او دغه برخه جدي ونیسي.
