د نجونو پر مخ د ښوونځیو د تړل کېدو دوه کاله پوره شول
![afghanistan society education](https://afghannow.net/wp-content/uploads/2023/09/1x-1-1-348x196.jpg)
دوه کاله پوره شول چې طالبانو د نجونو پر مخ ښوونځي تړلي دي
طالبان وايي چې دوی له شپږم پورته نجونو ته ښوونځیو ته د تګ تګلاره چمتو کوي، خو تر اوسه پر همدې بهانه دوی له زده کړو پاتې دي.
نور ولولئ: امریکايي چارواکي د ښځو پر وړاندې د طالبانو دریځ په سویلي افریقا کې له نژادي تبعیض سره ورته بولي
د ملګرو ملتونو سرمنشي انتونیو ګوتېرش نن په خپله اېکس(پخوانۍ ټوېټر پاڼه) لیکلي: “د دوشنبې په ورځ دوه کاله کېږي چې په افغانستان کې ښوونځیو ته د نجونو د ورتګ مخه نیول شوې ده. دا له بشري حقونو نه توجیه کېدونکی سرغړونه ده، چې ټول هیواد ته اوږدمهاله زیان رسوي. نجونې د ښوونځي دي، اجازه ورکړئ چې بېرته ښوونځيو ته لاړې شي.”
له طالبانو د ښوونځیو پرانیستلو پرلهپسې غوښتي
په دې مودې کې په افغانستان کې په کور دننه دیني عالمانو، سیاسي مشرانو او بهرنیو خیریه ټولنو او سازمانونو له طالبانو د ښوونځیو د پرانیستو غوښتنه کړې، خو تر اوسه نه یوازې د طالبانو د مشرتابه په دریځ کې بدلون نه لېدل کېږي، بلکې د طالبانو حکومت د ښځینه محصلینو پر مخ د پوهنتونونو دروازې هم تړلې دي.
تېرو دوو کلونو کې په کور دننه او له بهره په وار وار د نجونو پر مخ د ښوونځیو او پوهنتونونو د پرانیستل کېدو غوښتنې شوې.
نور ولولئ: هېډر بار وايي له طالبانو سره جوړجاړی دوی د ښځو پر وړاندې نور هم زوړر کوي
شاوخوا یوه میاشت وړاندې د اسلامي همکاریو سازمان یو پلاوی هم کابل ته د دې لپاره استولی وو چې له طالبانو سره پر دې موضوع تفاهم وکړي چې د نجونو زدکړې له اسلام سره ټکر نه لري.
طالبان پرلهپسې وعدې کوي، خو پایله معلومه نه ده
افغانستان کې د طالبانو حکومت د کورنیو چارو وزارت سرپرست سراج الدین حقاني له هغه پلاوي سره په لیدنه کې ویلي و: ”د نجونو زدکړې زموږ د ټولنې اړتیا ده او له شرایطو سره سم به دا موضوع حل شي ”.
دغه سازمان پر خپله اېکس پاڼه لیکي و، دواړو غاړو د نورو موضوعاتو تر څنګ د نجونو زده کړو او د ښځو د کار پر اړوندو ځینو مهمو مسلو خبرې کړې دي.
دا په داسې حال کې ده چې ځینې طالبان لوړ پوړي چارواکي هم د نجونو پر مخ د ښوونځیو د خلاصون غوښتنه کوي، خو پر دې سربېره بیا هم یادې موضوع ته حل نه پیدا کېږي او تر اوسه ناحله پاتې ده. د مثال په توګه د طالبانو د بهرنیو چارو وزارت سیاسي مرستیال عباس ستانکزي بار بار ویلي چې د نجونې زده کړې د دوی شرعي حق دی او باید ورکړل شي.