تاجکستان او ایران په وار وار اندېښنه ښودلي چې افغانستان کې د نشه یي توکو تولید او قاچاق سیستماتیک شوی
د منځنۍ اسیا هېوادونه په افغانستان کې د نشه یي توکو او د داعش له ګواښ ویره لري، خو طالبان بیا د دوی اندېښنه بې اساسه بولي.
د تاجکستان ولسمشر امامعلي رحمان د چهارشنبې په ورځ د ملګرو ملتونو کلنۍ غونډې ته د وینا پر مهال ویلي، له افغانستانه د نشهیي توکو قاچاق په بېسارې توګه زیات شوی دی. د نوموړي په وینا، د تاجکستان سرحدي ځواکونو په تېرو دوو کلونو کې له افغانستان سره پر پولې له لسو ټنو ډېر نشهیي توکي نیولي دي.
نور ولولئ: تاجکستان؛ طالبان دروغ وايي چې د نشهيي توکو پر وړاندې مبارزه کوو
هغه زیاته کړې: «په تېرو دوو کلونو کې د افغانستان له خاورې د نشهيي توکو قاچاق څو برابره زیات شوی. د تاجکستان واکمنو چارواکو په دې موده کې له دغه هېواد سره پر پولې لس ټنه نشهيي توکي نیولي او دا د تېرو کلونو په پرتله څو برابره زیات دي.»
طالبان بیا دا تورونه بې بنسټه بولي
خو د طالبانو ویاند ذبېحالله مجاهد د تاجکستان د ولسمشر دا څرګندونې ردوي او وایي، د طالبانو له واکمنېدو سره له افغانستانه بهر ته د هر ډول نشهيي توکو د قاچاق مخه نیول شوې او په بشپړ ډول یې په هېواد کې د ورکولو لپاره سخته مبارزه روانه ده.
په همدې حال کې د افغانستان لپاره د امریکا د سفارت شارژدافیرې کرن ډېکر پر خپلې اېکسپاڼې لیکلي چې په دوحه کې د اسلامي امارت له یوه پلاوي سره لیدلي دي.
نور ولولئ: ایران له افغانستانه د صنعتي نشهيي توکو قاچاق ډېرېدلو اندېښمن کړی
د ډېکر په خبره، په دې لیدنه کې دواړو لوریو د نشهیي توکو د له منځه وړلو پر متقابلو اندېښنو، دوهاړخیزو مسایلو، د افغانانو پر ملاتړ، د نشهيي توکو د تولید پر مخنیوي، د روږدو پر درملنې او د نشهيي توکو پر بدیل کښت یې خبرې اترې کړې دي.
طالبانو رښتیا د نشه یي توکو کرکیله صفر کړې ده؟
په ورته وخت کې د نړیوال امنیت شنونکي وايي، طالبانو تر یوه بریده په هېواد کې د کوکنارو د کښت او قاچاق په مخنیوي کې بریالی شوی، خو په وینا یې، لا هم په هېواد کې د نشهیي توکو کښت شته او په بشپړه توګه یې د له منځه وړلو لپاره سیمهييزې همکارۍ ته اړتیا ده.
د نړیوال امنیت شنونکی سیدمقدم امین زیاتوي: «د تېرو دوو کلونو پر مهال د کوکنارو د کښت او قاچاق مخنیوي برخه کې جدي مبارزه وشوه. هېڅوک یا ډله په ښکاره ډول دغه کار نهشي کولای، خو لا هم په نړیواله کچه د یوې ستونزې په توګه یادېږي او اړتیا ده چې د ورکولو لپاره یې د سیمې په کچه ګډه مبارزه وشي.»
دا په داسې حال کې ده چې د ملګرو ملتونو له نشهیي توکو او جرمونو سره د مبارزې ادارې شاوخوا دوه اوونۍ وړاندې په یوه راپور کې ویلي و چې افغانستان په نړۍ کې د متامفتامین تر ټولو لوی تولیدوونکی هېواد دی او ګاونډیو هېوادونو ته د دغو توکو قاچاق نږدې ۱۲ سلنه ډېر شوی دی.
