د هندوستان سوپر ليګ سياليو په لړ کې چينای سوپر ګينګ لوبډلې لکهنو سوپر جاينټ لوبډلې ته ماتې ورکړه
د آی پي اېل سياليو په دوام تیره شپه (دوشنبه) د اپريل مياشتې په ۳مه چينای سوپر ګينګ (CSK) لوبډلې، لکهنو سوپر جاينټ (LSG) لوبډلې ته ماتې ورکړه
د آی پي اېل سږني پړاو سياليو په دوام په شپږمه سيالۍ کې چې په چيډبراما لوبغالي کې ترسره شوه چينای لوبډلې د لکهنو نه خپله دويمه لوبه وګټله.
د نوموړې لوبې پچه د لکهنو لوبډلې لوبډلمشر کېل راهول وګټله او لومړی يې د توپ اچونې پریکړه وکړه.
د لوبې په لومړۍ پاڼۍ کې چينای لوبډلې د خپلو ۷ لوبغاړو په سوزيدو د پوره شل اورونو له لوبولو وروسته ۲۱۷ منډې ترسره کړې او خپلې سیالې لوبډلې ته يې ۲۱۸ منډې هدف وټاکه.
د چينای لوبډلې لپاره رټوراج ګیکواډ ۵۷، ډوين کانوې ۴۷ او امبټي رايډو ۲۷ ناسوزيدلې منډې وکړې، چې په خپله لوبډله کې له نورو مخکښ و.
د لکهنو له لوري روي بيشنای ۳، مارک ووډ ۳ او اويش خان ۱ لوبغاړی وسوزول.
چينای لوبډلې د پوره ۲۰ اورونو په لوبولو سره د ۲۱۸ منډو هدف وټاکه.
د لوبې په دويمه پاڼۍ کې د هدف تر لاسه کولو لپاره لکهنو لوبډله د لوبې ډګر ته راووته
د لکهنو له لوري کايل مايرس ۵۳، نيکولاس پوران ۳۲ او ايوش بنډوني ۲۳ منډې تر سره کړې او په ټوله کې د لکهنو لوبډلې ۲۰۵ منډې جوړې کړې چې ونه توانيدل ټاکلی هدف ترلاسه کړي او لوبه يې د ۱۲ منډو په توپير وبايلله.
د لکهنو لوبډلې پر وړاندې د چينای لوبډلې توپ اچونکو ښه توپ اچونه وکړه چې معين علي ۴، ټوشر ډيسپانډ ۲ او ميچل سنټنر ۱ ویکټ ترلاسه کړه چې خپله سياله لوبډلې يې پرينښوده چې هدف ته ورسيږي.
نور ولولئ: د هند سوپر ليګ سيالۍ (IPL) تېره ورځ شروع شوې
د لوبې غوره لوبغاړی معين علي وټاکل شو چې ۴ لوبغاړي يې وسوزول او هم يې په ۱۳ بالونو ۱۹ منډې تر سره کړې وې.
د دغه لوبو په لړ کې نن يوه لوبه ترسره کيږي چې ډهلي کپيټلس له ګجرات ټايټنس سره مخامخ کيږي.
د نن ورځې لوبه د افغانستان پر وخت د ماښام په ۶:۳۰ بجې تر سره کيږي.
په سږني آی پي اېل سياليو کې د ډهلي او ګجرات لوبډلو دويمه لوبه ده، ډهلي خپله لومړی لوبه لکهنو ته بايللی او ګجرات بيا خپله لومړۍ لوبه په ۵ ویکټو له چينای لوبډلې ګټلې ده.
د نن ورځې سيالي ارن جيټلي په لوبغالي کې ترسره کيږي.
