اړوند خبرونه:
د افغانستان سرپل ولایت کې هره ورځ د ۹۰۰ټنه نفتو استخراج
شهاب الدین دلاور: چنايي شرکت ته هله کانونه ورکوو چې افغانستان کې پروسس وکړي
د افغانستان او هند ترمنځ اړیکې د اوږدې تاریخي ملګرتیا بیلګه ده، چې ریښې یې د زرګونو کلونو فرهنګي، تجارتي او مذهبي راکړې ورکړې پورې غځېدلي دي. له مغولي دورې رانیولې د معاصر سیاست تر پړاوونو پورې، هند د افغانانو لپاره د تعلیم، درملنې او سیاسي پناه ځای پاتې شوی. اوس دا اړیکې له یوې نوې مرحلې تېریږي — د ویزو یوه تازه سیستم چې د هند د کورنیو چارو وزارت له خوا معرفي شوی.
د هند د بهرنیو چارو وزارت ویاند، رندیر جیسوال ویلي چې افغان اتباع کولی شي له دې وروسته د زده کړو، روغتیا، پایواز، ملګرو ملتونو ډیپلوماټیکو او نورو ځانګړو مواردو لپاره د نوي سیستم له لارې ویزو ته درخواست ورکړي. دا نوی سیستم د پخواني الکترونیکي پروسې ځای نیولی، چې تر دې مخکې افغانان د اضطراري یا متفرقه ویزو لپاره ورڅخه استفاده کوله.
خو له بلې خوا، د نوي سیستم معرفي کېدو سره هممهاله، یو شمېر شکایتونه راپور شوي چې ځینې کسان د ویزې د ترلاسه کولو په موخه له افغانانو زرګونه ډالر اخلي. د راپورونو له مخې، دغه فساد هم په افغانستان کې او هم نوي ډیلي کې ترسره کېږي، چې له امله یې ګڼ افغانان د درغلیو ښکار شوي.
د هند چارواکي ټینګار کوي چې دا پروسه یوازې د کورنیو چارو وزارت له خوا پر مخ وړل کېږي او هېڅ یو شخص یا منځګړی نشي کولی د ویزو په بهیر کې لاسوهنه وکړي. له افغانانو غوښتنه شوې چې له ناسم جریان څخه ځانونه وساتي او یوازې له رسمي لارو خپله ویزه تر لاسه کړي.
دا ستونزې، که څه هم له ادارې فساد سره تړاو لري، خو د افغانستان او هند ترمنځ د اوږدې همکارۍ ښکارندویي هم کوي. هند د افغانستان له جمهوري نظام سره پراخې همکارۍ لرلې — له ښوونځیو، سړکونو او روغتونونو جوړولو نیولې، تر لوړو زده کړو بورسونو او د ملګرو ملتونو له لارې د بشري مرستو پورې دا ټول موجود وو.
د طالبانو له بیا واکمنېدو وروسته، هند له احتیاط کار اخیستی، خو وروستۍ ویزهورکوونه ښيي چې نوي ډیلي غواړي له افغان ولس سره اړیکې وساتي، پرته له دې چې د کوم خاص سیاسي دریځ پلوي وکړي. دا سیاست د پاکستان لپاره د اندېښنې وړ بلل کېږي، ځکه چې اسلاماباد له اوږدې مودې راهیسې د افغانستان او هند نږدېوالی د خپل نفوذ خلاف ګڼي.
