افغانستان –
د هند له اړخ د غنمو او درملو مرسته به د پاکستان له لوری افغانستان ته لېږل کېږي پاکستاني چارواکي وايي هند ته یې اجازت ورکړې چې د افغانستان له وګړو سره د مرستې په هدف پنځوس زره مېټرک ټنه غنم او درمل د پاکستان له لوری افغانستان ته ولېږي.
ټاکل شوې ده چې دا غنم او درمل به د واګه له پولې څخه راتېر او بیا د پاکستان له خاورې نه افغانستان ته ولېږل شي. د پاکستان د خارجه وزارت په یوه اعلامیه کې ویلی چی دا پرېکړه یې له افغان ولس سره د خواخوږۍ پر بنسټ کړې. اعلامیه کې راغلي چې په اسلام اباد کې د هند شارژدافئر ته په دې تړاو رسمي وضاحت ورکړی. د طالبانو د خارجه وزیر امیر خان متقي هم څه وخت وړاندې د پاکستان لومړي وزیر عمران خان څخه غوښتنه کړې چې د هند مرستو ته اجازت ورکړي چې د پاکستان له لوری افغانستان ته ورسېږي.
دا هم ولولئ | کابل کی د پاسپورټونه ویش موقتی بند او نورو ولایتو کی روان دی
په ورته مهال چی په نوي ډیلي کې د افغانستان سفیر فرید ماموندزي له افغانستان سره د دې همکاری لپاره د هند د حکومت او د لومړي وزیر نرېندرا مودي څخه مننه کړې. نوموړي پخپله ټوېټر پاڼه لیکلي چی هیله لري چې نور هېوادونه او نړیوالې ادارې به هم په دې سختو شرایطو کې افغانانو سره د همکاری وکړی. هند شاوخوا دوه میاشتې وړاندې د پاکستان له حکومت څخه غوښتنه کړې چې د افغانستان لپاره د هند همکاری ته دي د پاکستان له لوری اجازه ورکړي.
بل اړخ ته د افغانستان لپاره د پاکستان د لومړي وزیر عمران خان ځانګړی استازی محمد صادق وايي پر غلام خان بندر دروازه د دواړو هېوادونو ترمنځ د سوداګریزو هلو لپاره هڅی کوی . نوموړي پنجشنبه د دې دروازې له لیدنی څخه وروسته پخپله ټويټر پاڼه لیکلي د غلام خان بندر دروازه له عرب سمندره بیا تر افغانستان پورې تر ټولو لنډه لار ده.
صادق خان هوډ ښکاره کړی کړی چې دا دروازه به ډېر ژر د سوداګرۍ او ټرانزيټ لپاره د افغانستان او پاکستان ترمنځ یوه مهمه لاره شي. سوداګر له پاکستاني چارواکو څخه غوښتنه کوي چې پر همدې دروازه دي د کرښې دواړه اړخ ته د سپرلیو ته هم د تورخم او چمن غوندی د تګ راتګ اجازه ورکړي.
