په فراه، هرات، غور او غزني ولايتونو کې سيمهييزې سرچينې وايي چې په دغو ولايتونو کې د سېلابونو راوتلو له کبله درې کسان مړه او پنځه نور ټپيان شوي دي.
د فراه ولایت سرچینو منلې چې جمعه د غويي پر ۱۴مه د دغه ولایت په اناردرې ولسوالۍ کې د سېلاب راوتلو له کبله یو تنکی ځوان مړ شوی دی.
جایدادونو ته اوښتی زیان
د دې سېلاب په پایله کې تر ۲۵ زیاتو استوګنیزو کورونو او سلګونه جريبه کرنيزې ځمکې ته زیان رسېدلی دی.
د هرات ولایت د کشک رباط سنګي ولسوالۍ په «یک دوکان» کلي کې هم یو ۸ کلن ماشوم د سېلاب راوتلو پېښه کې مړ شوی.
ورته مهال د مرغاب غور ولسوالۍ یو شمېر اوسېدونکو ویلي چې سېلاب د دې ولسوالۍ په بازار کې شاوخوا ۵۰ دوکانونه ویجاړ کړي دي.
نور ولولئ: دافغانستان د هوا پېژندنې اداره: په ۲۵ ولایتونو کې به درنه واوره وورېږي
نور ولولئ: په افغانستان کې د درنې واورې اورېدو له امله ځینې لارې تړل شوي
د میدان وردګ ولایت طالب سیمهییز مسوولاهم وايي چې د دغه ولایت د دایمیرداد ولسوالۍ په «طویکي» کلي کې پرون د سېلابونو راوتلو له کبله یوه ښځه مړه شوې او پنځه نور ټپیان شوي دي.
له دې وړاندې د لویو لارو تړل کېدل
اخوا، څه موده وړاندې په روزګان کې د طالبانو د اطلاعاتو او کلتور ریاست ویلي وو چې په دغه ولایت کې د سېلابونو راوتلو له کبله د کندهار – روزګان سړک تړل شوی دی. دغه راز، نوموړي ریاست زیاته کړې چې سېلاب یو بوډا وړی او مړی یې ورک دی.
ورته مهال، د روزګان مرکز ترینکوټ کې د یوې کوټې چت پرېوتو په پېښه کې بیا یو سړی مړ شوی و او بل ژوبل و.
د سرچینو په خبره، د دغه ماشوم مړی د ولسوالۍ کلینک ته وړل شوی او تراوسه یې د خپلو خپلوانو درک نه شته.
بل لور، په هلمند کې سرچینې وايي چې په دغه ولایت کې سېلابونو یو زر او ۴۰۲ تختې سولر له منځه وړي دي. د هغوی په خبره، سېلابونو او بارانونو بیا د دغه ولایت کروندګرو ته څه باندې ۸۰۰ میلیونه افغانۍ زیان اړولی دی.
تازه د طالبانو د ټرانسپورټ او هوايي چلند وزارت د هوا پېژندنې ریاست خبرداری ورکړی چې ښايي په راتلونکو ۲۴ ساعتونو کې د هېواد په ۲۶ ولایتونو کې تېز بارانونه وورېږي او د سېلابونو راوتلو لامل شي.
د یادونې ده چې له دوو ورځو راپدېخوا د هېواد په یو شمېر ولایتونو کې بارانونه ورېږي.
