اړوند خبرونه:
د افغانستان سرپل ولایت کې هره ورځ د ۹۰۰ټنه نفتو استخراج
شهاب الدین دلاور: چنايي شرکت ته هله کانونه ورکوو چې افغانستان کې پروسس وکړي
عبدالله یوف، چې د افغانستان د ټاپي د ګازو پایپ لاین د پروژې رئیس دی، ویلي چې تر اوسه ۱۴ کیلومتره د دې پایپ لاین د افغانستان په خاوره کې بشپړ شوي، او ۲۴ کیلومتره یې د هرات په ولایت کې سیمه هواره شوي ده.
نوموړي دا څرګندونې د طالبانو د والي نوراحمد اسلامجار سره د لیدنې پر مهال وکړې، او د دې پروژې د پرمختګ په برخه کې د طالبانو د محلي ادارې له همکاریو یې مننه هم وکړه.
د عبدالله یوف په وینا، که څه هم ننګونې شته، خو د هرات په ولایت کې د دې پروژې د تطبیق بهیر په چټکۍ روان دی، او د پایپ لګولو د عملیاتو د ګړندۍ کولو هڅې دوام لري.
ټاپي پروژه د سیمې له لویو انرژي لېږدونکو طرحو څخه ګڼل کېږي، چې موخه یې د ترکمنستان طبیعي ګاز افغانستان، پاکستان، او هندوستان ته انتقالول دي. دا طرحه نه یوازې اقتصادي ارزښت لري، بلکې د سیمې د همکاریو د پیاوړتیا لپاره هم مهمه ګڼل کېږي.
د ټاپي پروژه، چې د ترکمنستان، افغانستان، پاکستان، او هندوستان د نومونو لنډیز دی، د مرکزي او جنوبي آسیا د انرژي د زیربناوو د پرمختګ له ستراتیژیکو لومړیتوبونو څخه ده، او په ځانګړې توګه د افغانستان لپاره اقتصادي او سیاسي اهمیت لري.
