د ملي امنیت پخوانی مشر احمد ضیا سراج وايي چې عادل عارف له حقاني شبکې سره هغه وخت اړیکې درلودې

وروسته له هغې چې عادل عارف د کرمان په برید کې په لاس لرلو تورن شو، د افغانستان د ملي امنیت پخوانی مشر ویلي چې نوموړی په هېواد کې د څو ترهګریزو بریدونو پلان کوونکی و.

ښاغلي سراج ویلي؛ عارف له حقاني شبکې سره اړیکې درلودې او زغره والو موټر کې ګرځیده.

د ایران د استخباراتو وزارت د جمعې په ورځ اعلان وکړ چې عادل عارف چې په عادل پنجشیري هم مشهور دی، د کرمان په بریدونو کې لاس لري او د تهران په لویدیځ کې یوې سیمې کې لیدل شوی. دغه وزارت ویلي چې نومړی د امنیتي ځواکونو تر تعقیب لاندې دی.

پر کابل پوهنتون د عادل عارف برید

د افغانستان د پخواني حکومت د ملي امنیت وروستي مشر احمد ضیا سراج د جمعې په ورځ د – مرغومې په ۲۹- د عادل عارف په اړه افغانستان انټرنشنل ته نوي معلومات وړاندې کړي.

د ښاغلي سراج په وینا عادل عارف په ۱۳۹۹ کال کې پر کابل پوهنتون د برید په ګډون، پر ولسمشرۍ ماڼۍ راکټې بریدونو او یو شمیر نور بریدونه پلان کړي و.

عادل عارف د ۱۳۹۹ کال په لړم میاشت کې د احمد ضیا سراج په مشرۍ د افغانستان د ملي امنیت ریاست له خوا نیول شوی او د بګرام زندان ته ولېږدول شوی و.

نور ولولئ: په ایران کې د ملي ماتم اعلان؛ د قاسم سلیماني په تلین غونډه کې چاودنې له سلو ډېر کسان وژلي

نور ولولئ: طالبان: په ایران کې وروستۍ چاودنې په کلکه غندو

نور ولولئ: سي ای اې: په ایران کې چاودنې افغانستان کې د داعش خراسان کړې

احمدضیا سراج وايي؛ کله چې د ۱۴۰۰ کال د زمري په میاشت کې د پخواني افغان حکومت له نسکورېدو وروسته د طالبانو له خوا د زندان دروازې پرانیستل شوې، عارف د دغې ډلې له غړو سره یوځای له بنده خوشې شو.

د ښاغلي سراج په وینا، عارف “د طالبانو له حقاني شبکې سره د نږدې اړیکو د لرلو له امله د طالبانو د واکمنۍ په لومړیو اتو میاشتو کې په زغره والو موټرو ګرځیده.”

د افغانستان د ملي امنیت دغه پخواني چارواکي ویلي، عادل په جمهوري نظام کې په اعدام محکوم شوی و، خو د حکومت د نسکورېدو له امله یې د اعدام حکم نه و پلي شوی.

د کابل پوهنتون دغه بریدګر د «شهاب المهاجر» نږدې ملګری و

احمدضیا سراج وايي، چې عادل د داعش ډلې د خراسان څانګې مشر، «شهاب‌المهاجر» نږدې ملګری، او د دې ډلې یو له خطرناکو مشرانو څخه دی.

ښاغلی سراج ټینګار کوي، چې کابل ته د طالبانو له راتګ سره د داعش شاوخوا څلور زره غړي له زندانونو خوشې او د سیمې ولایتونو او هېوادونو کې خپاره شول.

د ایران د استخباراتو وزارت د عادل عارف د عکسونو په خپرولو سره د ایران له وګړو غوښتي چې د هغه په نیولو کې له دوی سره مرسته وکړي.

د ایران د استخباراتو د وزارت په خبرپاڼه کې راغلي دي چې عارف په کرمان کې د داعش د عملیاتو له قومندان عبدالحکیم توحیدي سره مستقیه اړیکه درلود او «تر دې وړاندې پر کابل پوهنتون د ځانمرګي برید د پلانولو په تور نیول شوی وو او په بګرام زندان کې له یو کال بند تیرولو وروسته له بنده خوشې شوی و.»

د دغه وزارت په خبرپاڼه کې ویل شوي، چې عارف له زندانه تر خوشې کېدو وروسته “جرمي فعالیتونو ته مخه کړې وه”.

د یادونې وړ ده چې د طالبانو په راتګ سره دا ډول ډېر مجرمین له زندانونو ازاد شول چې اوس په ترهګریزو بریدونو او نورو جرمونو کې لاس لري.