اړوند خبر:
امریکا: “افغانستان او یمن کې د ‘خوړو نړیوال پروګرام’ تمویل نه کوو”
کمیټې مشر برایان مست ویلي چې د متحده ایالاتو پخواني ولسمشر جو بایډن افغانستان ته میلیونونه ډالر پرته له کوم ځانګړي ماموریت استولي دي.
د هغه په وینا، بایډن د افغانستان لپاره د لوړو زده کړو د پراختیا لپاره پنځه میلیون ډالر ورکړي، په داسې حال کې چې طالبان د ټولو پوهنتونونو اداره په لاس کې لري او ښځې یې له ګډون څخه منع کړې دي.
هغه وایي چې طالبانو هغه ټولګي چې د لویدیځ یې ګڼي، تړلي دي، په داسې حال کې چې د اسلامي شریعت تدریس یې اجباري کړی دی.
هغه وویل: «موږ افغانانو ته پیسې ورکوو چې هغو ښوونځیو ته لاړ شي چې د طالبانو لخوا اداره کېږي، او هلته په مستقیم ډول د طالبانو د تبلیغاتو تر اغېز لاندې راځي. دا هېڅ منطقي نه ښکاري.»
د هغه په وینا، که متحده ایالات په افغانستان کې سفارت نه لري او له دې هېواد سره هېڅ اړیکه نه لري، بایډن باید د امریکا د مالیه ورکوونکو پیسې افغانستان ته نه وای استولې.
هغه په یوه ویډیویي پیغام کې ویلي: «د دوی د عمومي مفتش د وینا له مخې، د دې پیسو میلیونونه ډالر په مستقیم ډول د مالیاتو، اخاذۍ او له نورو لارو طالبانو ته ورکړل شوي دي. له همدې امله موږ د ټیم برچت لایحې ته اړتیا لرو چې تصویب شي او قانون شي.»
دغه د کانګرس غړي زیاته کړې چې متحده ایالات د طالبانو تر ادارې لاندې په افغانستان کې د مذهبي زغم د ترویج لپاره سلګونه زره ډالر مصرف کړي دي.
هغه وایي: «په افغانستان کې د مخدره موادو د اعتیاد د درملنې لپاره لسګونه میلیون ډالر لګول شوي دي. ولې موږ باید د هغوی د اعتیاد د درملنې لګښت ورکړو؟ دا هېڅ منطقي نه ښکاري، په ځانګړې توګه په پام کې نیولو سره چې طالبانو ادعا کړې چې د ټولو مخدره موادو کرنه او مصرف یې منع کړی دی.»
