که غواړی چې تاسو د کولمو ښه روغتیا ولرئ نو دغه لارښوونې تعقیب کړئ

د روغتیا په دې برخه کې څېړنه وايي چې تاسې باید د ۳۰ بېلابېلو بوټو خواړه وخوری.

په ۲۰۱۸ کال کې د امریکا کولمو پروژې په نامه له څېړنې وروسته ماهرینو وړاندیز وکړ، چې د کولمو لا زیات متنوع مایکروبیوم لپاره باید هره اونۍ د ۳۰ بېلابېلو بوټو سابه او میوې وخوړل شي.

په دې کې نه یوازې میوې او سابه شامل دي، بلکې د تخمونو، دانو، مصالحه جاتو او مغزیاتو په څېر شیان هم شامل دي.

د خوړو د نویو ډلونو لټون

ډاکتره روشي وړاندیز کوي، چې د معمول له مېوې او سبزې ورهاخوا د نویو ډولونو لټون پکار دی، چې یو څه ورسره خواړه متنوع شي.

د بریتانیا عامې روغتیا خدماتو ادارې مسوولین وايي، د داسې خوړو انتخاب چې زیات فایبر ولري، د خوراک په ښه هاضمه کې مرسته کوي او د قبضیت مخه نیسي.

دا اداره وايي، هر بالغ انسان باید هره ورځ تر ۳۰ ګرامه پورې فایبر وخوري. دوی وايي، د سپینو یا میده اوړو پر ځای د سبوس یا دانو لرونکې ډوډۍ یا د غنمینې مکروني پر ځای د شډلو وریجو کارول په خوړو کې د فایبر کچه زیاتولای شي.

نور ولولئ: والدینو ته د ماشومانو د روزلو او باور ورکولو په اړه غوره لارښوونې

نور ولولئ: بریالي خلک تل پر ځان باور لري

نور ولولئ:  پر خلکو د باور کولو چل

دغه راز هغه پټاټې چې له پوټکي سره په اوبو کې اېشول شوي وي یا د نخودو، مټرو او لوبیا په څېر دانې د فایبر نورې سرچینې بلل کېږي.

ډېر فایبر لرونکي خواړه

پريبایوټیک خواړه (د فایبر او کاربوهایډریټس ځانګړي ډولونه) په کولمو کې د ګټورو بکټریاوو د ودې لپاره رامنځته شوي دي. ځینې ډولونه یې کیلې، پیاز، شنه پیاز، اوږه، ګندنه، وربشي، سمنډول، خوباڼۍ، د توتانو ډولونه او لیمو یا نارنج دي.

پاکستان کې د معدې درملنې ماهره ډاکتره هانیشا خیماني وايي، تر شل کلنۍ پورې عمر کې د داسې خوړو خوراک چې مناسب غذائیت ولري، د اوږدمهاله روغتیا لپاره اړینه چاره ده.

ډاکتره خیماني زیاتوي: ”په دې موده کې د خوړو انتخاب د عمر په راتلونکو لسیزو کې د سختو ناروغیو په مخنیوي، د ذهني روغتیا په برخه کې او په ټول کې د فزیکي روغتیايي وضعیت لپاره مهم رول لري.”

د لندن کینګ کالج پروفیسر ټیم سپیکټر په خپل کتاب سپون فیډ: ”ولې هغه نژدې ټولې خبرې ناسمې دي، چې موږ ته د خوړو په هکله ویل شوي وو؟” کې لیکي، د خوړو تر منځ وقفه یا د بېلګې په توګه د سبا ناري او ماښامنۍ تر منځ د ۱۲ ساعتونو وقفه هم کېدای شي د کولمو میکروبونو ته ګټه ورسوي.