افغانستان کې د بشري حقونو وضعیت په اړه د ملګرو ملتونو ځانګړی رپورټر ریچارډ بېنېټ وايي: د کوچني اختر په مناسبت په افغانستان کې د سلګونو بندیانو خوشي کېدو په هکله هيڅ رپوټ نه دی ترلاسه شوی

د بشري حقونو وضعیت په اړه د ملګرو ملتونو ځانګړی رپورټر ښاغلي بېنېټ په یوه ټویټر پیغام کې ویلي چې د عیدالفطر په مناسبت د طالبانو حکومت لخوا د ۲۴۶۰ بندیانو خوشي کېدو او د ۴۸۱ بندیانو د بند مودې کمېدو په هکله هيڅ مالومات نه دي رسېدلي. نوموړي دغه راز په افغانستان کې د طالبانو له حکومته غوښتي چې د زدکړو فعال مطیع الله ویسا او مرتضی بهبودي په ګډون ټول هغه کسان خوشي کړي چې د ده په وینا په خپلسري توګه یې نیولي دي تر څو دا کسان اختر له خپلو کورنیو سره تېر کړي.

نور ولولئ: د اماراتو او سعودي۱۴۰ ټنه تازه بشري مرسته؛ طالبان وايي پر اړمنو افغانانو به ووېشل شي

طالبانو د مارچ په وروستیو کې ومنله چې دغه هېواد کې یې د پوهنې د ودې او پراختیا یو پېژندل شوی فعال او د قلم لار ټولنې مشر مطیع الله ویسا نیولی دی

طالبان وايي هغه یې په دې خاطر نیولی چې د دوی په وینا “خپلسري فعالیتونه” یې کول او د نظام ضد هڅونې یې درلودې. افغان الاصله فرانسوی خبري عکاس مرتضی بهبودي هم له تېرو ۱۰۰ ورځو راهیسې د طالبانو حکومت د استخباراتو په بند خونه کې دی.

نور ولولئ: طالبانو د نجونو د تعلیم فعال مطیع الله ویسا نیولی

د یادونې ده چې تېره ورځ د طالبانو حکومت سترې محکمې اعلان وکړ چې د طالبانو د مشر ملا هبت الله اخوند زاده د امر له مخې یې د کوچني اختر په مناسبت سلګونه زندانیان خوشي کړي او یا یې د بند موده کې کموالی راوستلی دی

یادې محکمې خوشې شوي بندیان د بښنې مستحق بللي او په وینا یې هغه چې د تخفیف وړ وو د بند موده یې کمه شوې.

نور ولولئ:امريکا کې بشري حقونه د امريکايانو لپاره سرخوږی ګرځېدلي

د طالبانو سترې محکمې په خپره شوې خبرپاڼې کې ویلي و په دې وروستیو کې د بې برخلیکه او بښنې مستحق بندیانو معلومولو لپاره بېلابېل پلاوي ګومارل شوې وو.

چې د هر اړخیزې پلټنې وروسته یې د اختر په مناسبت ټول ټال شاوخوا ۳۰۰۰ کسان د خوشې کېدو یا تخفیف وړ بلل شوي.

تر اوسه نه په ډاګه شوې چې د خوشي کېدو په لېست کې مطيع الله ويسا او مرتضی بهبودي هم شامل دي که نه.