ستانکزی: له زدهکړو سره مخالفت له ملت سره جفا او ظلم دی
![abas stanikzai](https://afghannow.net/wp-content/uploads/2023/12/Abas-stanikzai-348x196.png)
د طالبانو د بهرنیو چارو مرستیال شیر محمد عباس ستانکزی له زده کړو سره د طالبانو مخالفت له ولس سره ظلم بللی
د طالبانو په حکومت کې د بهرنیو چارو وزارت سیاسي مرستیال شېر محمد عباس ستانکزي یو ځل بیا د خپل حکومت له مشرانو غوښتي چې په افغانستان کې د ټولو وګړو پر مخ د زدکړو دروازې پرانیزي.
ښاغلي ستانکزي چې په کابل کې یې د سرحدونو، قومونو او قبایلو چارو وزارت اړوندو تعلیمي بنسټونو د زده کوونکو په فراغت غونډه کې خبرې کولې، د نجونو له زدکړو سره مخالفت د ځینو کسانو شخصي “خواهشاتو” وبلل.
نور ولولئ: عباس ستانکزی: پاکستان دې موږ عکس العمل ته نه مجبوروي
د طالبانو په حکومت کې د نجونو د زدکړو دغه ملاتړ چارواکی وایي، “که کوم کسان د خپلو شخصي خواهشاتو په خاطر یا څه نور عوامل پکې وي، د هغو په خاطر باندې بعضې وختو کې مخالفت کوي له علم سره، زه فکر کوم دا یوه لویه جفا ده د دې ملک له بچیانو سره.”
د علم دروازې باید پرانیستل شي
نوموړی وایي په هیڅ صورت کې باید د علم دروازې بندې نه شي او زیاتو کوي” که څوک دلایل لرې دېته، که څوک کوم دلیل او برهان لري دې ته، را و دېوځي میدان ته او خپل برهان دې ووایي چې په دې دلیل جواز نه لري یا موږ اجازه نه ورکوو.”
ستانکزی خبرداری ورکوي چې د نجونو پر مخ د ښوونځیو او پوهنتونو تړل کېدو له امله د ولس او د دوی د حکومت ترمنځ واټن زیات شوی دی، چې دا کار به د دوی په زیان تمام شي.
نور ولولئ: عباس ستانکزی وايي نوي ډهلي کې به افغان سفارت ژر پرانیستل شي
ښاغلي ستانکزي چې له دې مخکې یې هم څو ځله د خپل حکومت او مشر دا پرېکړه ننګولې او وایې یاده ستونزه د دې لامل شوې چې هم ملت او هم نړیوال له دوی څخه ناراضه شي.
هغه وایي: “د امارت په چارواکو او مسئولینو باندې مې همدا غږ دی د ورورګلوۍ او انډيوالۍ، چې د علم دروازې دې زموږ د ملک د ځوان نسل او بچیانو په مخ خلاصې کړي.
هغه ټولنه په تیاره کې ده چې د علم دروازې بندې شي
د نوموړي په ټکو هر ملک کې چې د عمل دروازې تړلې وي هغه ملک “تاریک” دی، هر ملک کې چې د عمل دراوزې تړلې وي هغه به په ” فقر مبتلا” وي، هر ملک چې د علم دروازې تړلې وي هغه ملک به اشغاليږي او د نورو قومونو تر اغېر لاندې به راځي او هر ملک کې چې د علم دروازې تړلې وي نورو ته به یې د احتیاج لاس نیولی وي.
د طالبانو په حکومت کې د نجونو د زدکړو پر سر دا ډول لانجمنې خبرې او مخالفتونه له لومړیو را روان دي خو چارواکي یې وایې چې دا ستونزه لنډ مهاله ده او ژر به یې حل کړي.
دا په داسې حال کې ده چې په یادې پرېکړې له ۸۰۰ ورځو ډېر وخت اوښتی خو افغان نجونې زده کوونکې وایې چې لاهم په تمه دي چې بل امر به کله راځي.
نړیواله ټولنه او نړیوال بار بار د نجونو پر مخ د زده کړو د دروازو خلاصول غواړي خو طالبانو د نامعلوم لامل له مخې تړلي او اجازه نه کوي چې دوی پوهنتونو او ښوونځیو ته لاړې شي.