د سلوانیا پارلمان د فلسطین په رسمیت پېژندلو ته رایه ورکړه او د فلسطین بیرغ یې په ډیپلوماټیکو سیمو کې پورته کړ
هاخوا د نړۍ ګڼو هېوادونو او سازمانونو په غزه کې د اسرائیلو وحشتونه غندلي او ورځ تر بلې د صهیونیستي رژیم پر وړاندې د اعتراض او غندنې لړۍ پراخېږي.
د ناروې، ایرلنډ او اسپانیا له خوا د یو خپلواک هېواد په توګه د فلسطین د رسمیت پېژندنې په لړ کې اوس سلوانیا هم دغه هېواد په رسمیت وپېژاند.
اسوشیټېډپرېس راپور ورکړی چې د دغه هېواد پارلمان سېشنبه د جون پر ۴مه د رایو له اکثریت وروسته د یو خپلواک هېواد په توګه د فلسطین رسمیت پېژندنه تصویب کړې ده.
هېڅ مخالفه رایه نه وه
د سلوانیا د پارلمان استازو دا موضوع په ۵۲ منلو او هېڅ مخالفو رایو تصویب کړې ده.
بل خوا د سلوانیا د بهرنیو چارو وزیرې تانیا فاجون په اېکسپاڼه کې ویلي: «د فلسطین ګران ولسه، د سلوانیا د نن ورځې وروستۍ پرېکړه د سولې او هیلې پیغام دی.»
هغې زیاته کړې چې هېواد به یې د فلسطینیانو او اسرائیل د امنیت لپاره نه ستړي کیدونکې هلې ځلې وکړي.
نور ولولئ: د فلسطیني ټپي ماشومانو ۱۶مه جوپه د درملنې په موخه متحده عربي اماراتو ته ولېږدول شوه
نور ولولئ: د ملګرو ملتونو عمومي اسمبلي: فلسطین دې ددې سازمان غړی شي
د یادونې ده چې د سلوانیا پارلمان ۹۰ غړي لري او د پارلمان پاتې غړي د رایې ورکولو پرمهال حاضر نه وو.
د دغه هېواد دولت تېره اوونۍ د فلسطين د رسميت پېژندنې طرحه تصويب کړه او دا طرحه يې د وروستي تصويب لپاره پارلمان ته واستوله.
د سلوانیا دا پرېکړه څو ورځې وروسته تر دې کېږي چې اسپانیا، ناروې او ایرلنډ د فلسطین دولت په رسمیت وپېژاند.
په غزه کې د اسرائیلو وحشتونه
اسرائیلو سره له دې چې په غزه کې یې عام قتل وکړ او لا هم روان دی، د سلوانیا ددې پرېکړې پر وړاندې یې کلک غبرګون ښودلی دی.
پرون چهارشنبه د فلسطین عامې روغتیا وزارت وویل چې په غزه کې د اسرائیلو په بریدونو کې تر دې مهاله ۱۵۴۸۲ ماشومان شهیدان شوي دي.
په ورته وخت کې د امریکا ولسمشر جوبایډن هم د اسرائیلو پر صدراعظم بینیامین نتنیاهو غږ وکړ چې د امریکا په څېر په ناڅاپي جګړو کې ځان ښکېل نه کړي.
د نړیوالې محکمې، بشري حقونو د بنسټونو، ملګرو ملتونو سازمان او نورو سازمانونو بار، بار په غزه او رفح کې د اسرائیلو د صهیونیستي رژیم بریدونه غندلي دي.
خو اسرائیل بیا خپل جګړیز سیاست ته دوام ورکوي او اوربند ته غاړه نږدي.
