سویډن کمېټې خبرداری ورکړ چې د طالبانو د فشارونو له امله نور په افغانستان کې فعالیت نه کوي
له دې وړاندې د دبلیو ایف پي په څېر نورو نړیوالو مرستندویه بنسټونو هم خبر ورکړی و چې طالبان یې په کارونو او د مرستو په وېش کې نېغ په نېغه مداخله کوي، خو طالبانو بیا د یادونو بنسټونو دغه ادعاوې رد کړي دي.
تازه د افغانستان لپاره د سوېډن کمېټې د طالبانو له خوا د فشارونو د زیاتېدو او د خپلو کارکوونکو د خوندیتوب له امله د جمعې په ورځ د (کب ۲۵ مه) په افغانستان کې خپل فعالیتونه ودرول.
دغه مرستندویه اداره وايي، په سټاکُولم کې د قران کریم د سوځولو له پېښې وروسته د طالبانو تر فشارونو لاندې وه.
سویډن کمېټه او د کارکوونکو خوندیتوب یې
د سوېډن کمیټې عمومي رییس اندریاس استفانسون له سوېډن راډیو سره په مرکه کې په افغانستان کې د دې ادارې د فعالیتونو د ځنډولو خبر ورکړ.
هغه زیاته کړه، چې دغه پرېکړه د طالبانو په غوښتنه او د دغې کمېټې د کارکوونکو د خوندیتوب په پام کې نیولو سره شوې ده.
نور ولولئ: سیګار: امریکا د طالبانو په حاکمیت کې له افغانانو سره ۳۰۰ میلیون ډالر بشري مرسته کړې
نور ولولئ: سیګار وايي، طالبان د بشري مرستو رسونې ادارو کې مداخله کوي
نور ولولئ: سیګار وايي، په انجیوګانو کې پر ښځو د طالبانو بندیز د نجونو لومړنۍ زده کړې اغېزمنې کړي
اندرياس استفانسون وويل: « هغه کار او فعالیتونه، چې جواز ونه لري ښایي له ځان سره ډېر ګواښونه ولري.»
هغه زیاته کړه: «په استکُهلم کې د قران کریم له سوځولو راهیسې د سوېډن کمیټې په څو ځایونو په ځانګړو سیمه ییزو مرستو سره خپلو کارونو ته دوام ورکړی؛ خو اوس د طالبانو له خوا قوي پیغامونه ترلاسه شوي دي.»
د همکارو مؤسسو پر مټ همکاریو ته دوام ورکول
د افغانستان لپاره د سوېډن کمیټې مشر وویل، هیله لري چې دغه بنسټ په افغانستان کې د همکارو موسسو له لارې خپلو ځینو فعالیتونو ته دوام ورکړي.
طالبانو د چنګاښ په میاشت کې اعلان وکړ، چې تر څو د سوېډن حکومت په استکُهلم کې د قرآن کریم د سوځولو له امله له مسلمانانو بښنه ونه غواړي د دغه هېواد ټول فعالیتونه به په افغانستان کې ودروي.
د طالبانو له دې پرېکړې او فشارونو وروسته د افغانستان لپاره د سوېډن کمېټې یوه اوونۍ وروسته اعلان وکړ، چې په موقت ډول به په افغانستان کې خپل فعالیتونه ودروي.
د افغانستان لپاره د سوېډن کمیټه له څه باندې ۴۰ کلونو راهیسې په دغه هېواد کې کار کوي.
د یادونې وړ ده چې طالبان د مرستندویه بنسټونو په کارونو کې هم نېغ په نېغه مداخله کوي او اکثره وخت د مرستو په وېش کې پر مؤسساتو خپل جنګالي مني او مرستې ورته اخلي.
