سیګار په تازه راپور کې وايي چې واشنګټن د طالبانو تر حاکمیت لاندې افغانستان سره ۸۸۵ میلیونه ډالره مرستې کړې دي
پر افغانستان د طالبانو د بیا واکمنېدو شاوخوا درې کاله تېرېږي، همهاله له دوی سره د امریکا په ګډون اروپايي ټولنه، متحده عربي امارات، جاپان او نور هېوادونه مرستې کوي.
د سیګار ادارې او نورو بنسټونو بار، بار ویلي چې طالبانو د بهرنیو مرسته کوونکو او خیریه بنسټونو په کارونو کې مداخله کوي او د مرستو په لېستونو کې خپل جنګیالي ځای پر ځای کوي، خو طالبان وايي چې دوی د نړیوالو موسساتو په کارونو کې مداخله نه ده کړي.
د طالبانو تر حاکمیت لاندې د امریکا مرسته
د افغانستان د بیارغونې لپاره د امریکا ځانګړې څارونکې اداره یا سیګار وايي چې امریکا د روان کال له پیله تر دې دمه د طالبانو تر واک لاندې افغانستان سره ۸۸۵ میلیونه ډالره مرسته کړې ده.
دغې ادارې شنبه د لړم پر ۱۹مه، د اېکسپاڼې له لارې په یو خپاره کړي بیان کې لیکلي چې دا پيسې افغانستان ته د بشري مرستو د وړاندې کولو په موخه ورکړل شوې دي.
نور ولولئ: سیګار: واشنګټن د طالبانو تر واک لاندې افغانستان سره ۱۷ میلیارد ډالره مرسته کړې
نور ولولئ: سیګار: امریکار د طالبانو په حاکمیت کې له افغانانو سره ۳۰۰ میلیون ډالر بشري مرسته کړې
د سیګار په وینا، امریکا د طالبانو تر واک لاندې د افغانستان ترټولو ستر تمویلونکی دی.
د راپور پر بنسټ، امریکا په تېرو درېیو کلونو کې افغانستان او افغان کډوالو ته ۲۱.۰۶ میلیارده ډالر ځانکړي کړي دي.
په خبرپاڼه کې راغلي چې د دې پیسو ۳.۳۳ میلیارده ډالره په افغانستان کې د بشري او پراختیايي مرستو لپاره ورکړل شوي دي.
همداراز د افغانستان د بشرپاله مرستو صندوق ته ۳.۵ میلیارده ډالر لېږدول شوي دي.
دغه مرستې نورې چېرته لګېدلي؟
د دې ترڅنګ، له افغانستانه د امریکايي ځواکونو د پخوانیو همکارانو د لېږد لپاره ۸.۷ میلیارده ډالر او همداراز ۵.۵۳ میلیارده ډالر د هغوی بیامېشتېدو لپاره ځانکړي شوي دي.
که څه هم امریکا طالبان په رسمیت نه پیژني، خو په تېرو درېیو کلونو کې یې د دغې ډلې تر واک لاندې افغانستان سره د بشري مرستو په نوم ملیاردونه ډالره مرسته کړې ده.
له دې مخکې سیګار ویلي و چې د دې مرستو ډېره برخه د طالب چارواکو جیبونو ته ځي.
بلخوا د یادو موسساتو ځایي کارکوونکو او کره سرچینو هم ویلي چې طالبان ددوی په کارونو کې نېغه مداخله کوي. دوی زیاتوي، د طالبانو مداخله د کارونو پر وخت نه ترسره کېدو او ستونزو پیدا کېدو لامل شوي ده.
