طالبان وايي، په غزني کې ډرون برید نه دی کړی بلکې دا خلک افواهات خپروي
په ځینو راپورونو کې ویل شوي چې په غزني کې د ډرون په برید کې د القاعدې شبکې غړي په نښه شوي دي او دا برید په ګیرو ولسوالۍ کې شوی، خو طالبان بیا وايي، هلته کوم برید نه دی شوی.
د افغانستان د ملي امنیت پخواني رئیس ویلي وو چې ډرون الوتکې د غزني په ګیرو ولسوالۍ کې د القاعدې شبکې غړي په نښه کړي دي.
خو د غزني لپاره د طالبانو د اطلاعاتو او فرهنګ رییس د افغانستان د ملي امنیت د پخواني رییس دا ادعا ردوي چې په دغه ولایت کې تېره یکشنبه ډرون برید شوی دی.
تېره یکشنبه غزني کې چاودنه
رحمت الله نبیل ویلي، چې د غزني په ګېرو ولسوالۍ کې د بې پیلوټه الوتکې په برید کې د هند نیمه وچې لپاره د القاعدې غړي په نښه شوي دي.
خو حمدالله نثار نن د ښاغلي نبیل د دغې ادعا په غبرګون کې په خپل اېکس کې زیاتوی: «نه په غزني کوم برید شوی او نه هم هلته داسې څوک شته چې په افواهاتو کې یې یادونه شوې ده.»
نور ولولئ: ملا یعقوب: زموږ هوايي حریم لا هم اشغال دی
نور ولولئ: طالبان:کابل کې د ظواهري د حضور په اړه هیڅ معلومات نه لري
نور ولولئ: امیر خان ممتقي د ډرون الوتکو په اړه څه ویلي دي؟
د غزني په ګېرو ولسوالۍ کې تېره یکشنبه په یوه چاودنه کې د ماشومانو په ګډون د ۹ کسانو د وژل کېدو خبر خپور شو.
خو سرچینې دغه برید ډرون یادوي
هغه مهال د طالبانو امنیه قومندانۍ وویل، چې دا چاودنه د روسیې د وخت د ناچاودې مرمۍ له امله وه.
خو پرون یوې سرچینې ویلي، چې دلته ډرون برید شوی او پکې۱۲ تنه وژل شوي دي.
رسنیو د هغه لیک یوه کاپي هم ترلاسه کړې، چې له مخې یې د طالبانو مشر د غزني په ګېرو کې د بې پېلوټه الوتکې د برید او د دغو الوتکو د څارنې په اړه د بېړنۍ غونډې او پلټنې غوښتنه کړې وه.
رحمت الله نبیل د دې خبر له خپرېدو وروسته په ایکس پاڼه لیکلي، چې د برید هدف د هند په نیمه وچه کې د القاعدې ډلې غړي وو، چې په پاکستان، هند، بنګله دېش او میانمیار کې د اسلامي خلافت د جوړولو لپاره له دغو هېوادونو سره په جګړه بوخت دي.
نوموړی زیاتوي؛ هغه بې پیلوټه الوتکه چې دا برید یې کړی، د پاکستان له یوې اډې څخه یې الوتنه کړې ده.
له دې وړاندې ډرون بیا په کندهار کې هم هوايي ګرمې کړي دي.
