د طالبانو بهرنیو چارو وزارت وايي، دوی له ایران حقآبه نه ده ګرځولي بلکې وچکالي ده
د طالبانو حکومت د ایراني پلاوي له لوري د دهراود د هایدرولوجیکي وسایلو د لیدنې په اړه یوه خبرپاڼه کې ویلي، دوی هر ممکنه خیر ته په وینا او عمل کې ژمن دي، په تېره د اوبو برخه کې چې یوه حیاتي ماده ده او د خپل هېواد او د ایران سیستان اوسېدونکو لپاره یې ورسوي.
نور ولولئ: د ایران او افغانستان د اوبو جنجال؛ ایران وايي، چې هلمند سیند کې له خپلې حقابې نه تېريږي
د طالبانو د بهرنیو چارو وزارت په خبرپاڼه کې راغلي، د ایران یوه تخنیکي پلاوي د اسد میاشتې پر ۱۸مه د ابهاماتو لیرې کولو لپاره د دهراود هایډرولوجیکي سیستم کې د اوبو د جریان د کتنې زمینه برابره شوه.
خبرپاڼه وايي، ایراني پلاوي له کتنې او د اوبو له ندازه کولو وروسته روان کال د اقلیمي بدلون د نړیوالې پدیدې له امله د عادي اوبو له کال څخه ډېر کم وباله.
ایراني پلاوي د کتنې پایله
طالبان وايي، ایراني پلاوي د خپلې کتنې پایله کې ومونده چې د هلمند سیند لږ تر لږه د اوبو جریان لري او د ارغنداب، موسی کلا، ارغستان او ترنک په شان مرستندویه سیندونه یې په بشپړه توګه وچ دي، چې په دې توګه د هلمند سیند اوبه د ډېلټیا سیمې ته رسېدل خورا ستونزمن دي.
د طالبانو د حکومت په خبره، د اوبو د جریان د احصایې د تحلیل پر بنسټ، دا په ښکاره جوتېږي چې ایران ته د اوبو حقابې د نه رسېدو برخه کې هېڅ ډول انساني کړنه او اراده نه ده شامله، خو مجبره حالت ددې کار لامل شوی دی.
د طالبانو د بهرنیو چارو وزارت د خبرپاڼې پای کې وايي، د باران په ورېدو او د مناسبو شرایطو په برابرېدو به د هلمند سیند لاندې سیمو کې د افغانستان په نیمروز ولایت او د ایران د اسلامي جمهوریت د سیستان د اوسېدونکو حقابه تامین کړل شي.
ایراني پلاوي د هلمند او دهراود د اوبو سرچینې وکتلې
وړاندې، د افغانستان لپاره د ایران د ولسمشر ځانګړي استازي او کابل کې د ایران سفارت چارسمبالي حسن کاظمي قمي ویلي وو، چې ایراني کارپوهانو په افغانستان کې د هلمند (هیرمند) اوبو سرچینې کتلې دي.
ایراني رسنیو د ښاغلي کاظمي له خولې ویلي، چې “زموږ تخنیکي ډله دا مهال په کابل کې ده، لیدنه وشوه او راپور به یې ډېر ژر موږ ته ورسېږي”.
نور ولولئ: د فراه د بخش اباد بند د جوړېدو چارې پیل شوي
د ایران د ولسمشر ابراهیمي رئیسي ځانګړي استازي زیاته کړې ده چې دا لومړی ځل دی ایراني کارپوهان په دهراود سیمه کې د اوبو د اندازه کولو سرچینې ته ورغلي دي.
دوی د تېر جون په پای کې د دې لیدنې ژمنه کړې وه.
خو وړاندې د طالبانو د حکومت ویاند ذبیح الله مجاهد له بي بي سي پښتو سره په مرکه کې د دهراود سټېشن او بندونو لیدلو ته د ایراني پلاوي د ورتګ احتمال رد کړی و او ویلي یې وو چې په تړون کې داسې څه نه شته.
هغه زیاته کړې وه “له ایراني چارواکو زموږ جدي تمه دا ده چې د ۱۳۵۱ کال له تړون سره دوی خپلې هیلې عیارې کړي”.
د ایران استازي د طالبانو د هغې ادعا د ثبوت لپاره چې ګنې اوبه کمې شوې دي، د ایراني پلاوي د لیدنې په اړه وویل چې “د تړون له مخې موږ کولای شو د اوبو د کمښت په اړه د مقابل لوري ادعا تر پوښتنې لاندې راولو”.
د دهراود د اوبو د اندازه کولو سرچینه د کجکي بند په پاسنۍ برخه کې پرته ده چې د هلمند سیند ته د ننوتلو اوبو اندازه محاسبه کوي.
