دا څووم ځل دی چې طالبان په رسمیت پېژندلو کې له نړیوالې ټولنې ګیله کوي
په دوحه کې د طالبانو د سیاسي دفتر مشر سهیل شاهین د نړیوالې ټولنې له خوا د دوی د ادارې په رسمیت نه پیژندل د دواړو لورو په زیان بولي.
د شنونکو باور څه دی؟
د شنونکو په وینا، طالبان داسې مهال له نړیوالې ټولنې رسمیت غواړي چې دوی تر اوسه نه اساسي قانون لري او نه هم داسې بله وثیقه چې د دوی د نظام ډول معرفي کړي. د نظر خاوندان وايي، تر څو چې په هېواد کې د نجونو ښوونځي، پوهنتونونه او نور بشري حقوق خوندي نه شي، فکر نه کېږي چې نړۍ دې د طالبانو اوسنی رژیم په رسمیت وپېژني.
زیات ولولئ: امریکا یو ځل بیا د طالبانو هر ډول په رسمیت پیژندل رد کړل
خو پر دې ټولو سربېره شاهین ټینګار کوي او وایي چې کابل او نړیواله ټولنه باید له رامنځته شویو فرصتونو ګټه واخلي، د طالب مشرانو پر سفرونو بندیزونه ایسته کړي، خو نړیوالې ټولنې نه یوازې طالب مشران له تور لېسته لرې کړي بلکې دې لېست یې نور هم ورزیات کړي دي. همداراز، د طالبانو د سیاسي دفتر مشر له نړیوالې ټولنې دا هم وغوښتل چې، پر دوی د فشارونو پر ځای د تعامل او همکارۍ لاره غوره کړي.
په ملګرو ملتونو کې د نصیر احمد فایق د کار پر دوام نیوکه
شاهین چې پخوا د طالبانو لخوا په ملګرو ملتونو کې د کابل د استازي په توګه معرفي شوی و، د افغانستان د استازي په توګه د “نصیر احمد فایق” د کار پر دوام نیوکه وکړه او ویې ویل چې نوموړی د پخواني حکومت استازی دی او د خلکو او هېواد استازیتوب نه کوي.
نوموړي دغه راز د طالبانو له استازو پرته د نړیوالو غونډو جوړېدل بې ګټې وګڼل او له هغو هېوادونو یې وغوښتل چې د افغانستان په اړه د غونډې کوربه توب کوي، په دغو غونډو کې د ګډون لپاره د افغانستان واکمنې ادارې ته بلنه ورکړي.
طالب چارواکي دا ډول څرګندونې په داسې مهال کوي، چې نړیواله ټولنه د دوی د رژیم افراطي کړنې او قیودات، دوی سره د نړیوال تعامل پر وړاندې خنډ بولي. بل لور ته طالب ویاند ذبیح الله مجاهد هم ویلي و، چې د افغانستان لپاره د امریکا خاص استازی دې په نورو هېوادونو کې د افغانستان په اړه د غونډو جوړولو پر ځای دې له طالبانو سره مخامخ همکاري او له نږدې کار وکړي تر څو ستونزو ته ګډ حل پیدا شي.
