طالبان وايي چې دوی هغه یوولس ماشومان چې له کورنیو ورک وو، موندلي او له کورنیو سره یو ځای کړي دي
د طالبانو کار او ټولنیزو چارو وزارت ویلي ۱۱ ورک ماشومان يې له خپلو کورنیو سره یو ځای کړي.
د طالبانو کار او ټولنیزو چارو وزارت وايي، تازه یې د سرپل، بادغیس او بدخشان ولایتونو ۱۱ ورک شوي ماشومان بېرته له خپلو کورنیو سره یو ځای کړي دي.
د دوی په خبره دغه ماشومان چې له ایرانه را اړول شوي دي، د هغوی کورنیو ته یې له ضمامت اخیستلو وروسته سپارلي دي.
دغه ماشومان په دریو ولایتونو کې سپارل شوي
دغه وزارت نن چهارشنبه د (سلواغې څلورمه) په خپله ایکس پاڼه لیکلي چې د دریو ولایتونو سرپل، بادغیس او بدخشان ۱۱ ماشومان یې د هغوی له کورنیو سره له اړیکو نیولو او پېژندلو وروسته ورسپارلي دي.
نور ولولئ: له کتاب پلورنځیو سیاسي او مذهبي کتابونو راټولول؛ طالبان یې د ذهني انحراف مخنیوی بولي
نور ولولئ: تحریک طالبان پاکستان: موږ له اسلام اباد سره په مذاکراتو باور نه لرو
یاد وزارت وايي، دغه ماشومان په هرات ولایت کې د جګړې ماشومان (وار چایلډ) دفتر له لوري په سرپل او باغیس ولایتونو کې د طالبانو د کار او ټولنیزو چارو ریاستونو ته سپارل شوي وو.
د وزارت د معلوماتو له مخې د دغو ماشومانو له ډلې یو یې ۱۲ کلن او د بدخشان اوسېدونکی دی چې ۳۵ ورځې وړاندې ورک شوی و.
د کډوالو راتګ او د کورنیو د غړو نادرکه کېدل
دغه ماشومان په داسې حال کې خپلو کورنیو ته سپارل شوي چې په ورستیو دریو میاشتو کې د پاکستان او ایران له لوري افغان کډوال په زوره له دغو هیوادونو ایستل کیږي او ډیری وختونه د کورنیو غړي له یو بل څخه جلا شوي هم وي.
له ماشومانو څخه د ملګرو ملتونو د ملاتړ وجهي صندوق په خپلو خپرو شویو راپورونو کې تل د افغان ماشومانو په اړه اندېښنې ښودلې او ویلي یې دي چې، په دغه هیواد کې د بې وزلۍ، وچکالۍ او داخلي کډوالۍ له امله ماشومان اړ شوي چې درانه کارونه وکړي او یا خپل هیواد پرېږدي.
د یاودنې وړ ده چې په افغانستان کې د طالبانو بیا واک ته له رسېدو سره له دغه هېواده د افغانانو وتل زیات شوی او تر ټولو ډېر انساني قاچاق هم پر افغانانو کېږي چې زیاتره ځوانان یې ایران، ترکیه او نورو هېوادونو کې ورک او د ځینو جسدونه موندل شوي دي.
