فضا ته د تر ټولو ځواکمن فضايي راکټ استول ځنډېدلي
![643c525bebcc7 starship](https://afghannow.net/wp-content/uploads/2023/04/643c525bebcc7_starship.png)
فضا ته د تر ټولو ځواکمن راکټ استول ځنډېدلي. دا ستوربېړۍ سټارشيپ نومېږي او د اېلان ماسک سپېس اېکس شرکت جوړه کړې
سپېس اېکس شرکت دغه ستوربېړۍ د میاشتې او مریخ د سپړلو او مطالعې لپاره جوړه کړې.
د اېلان ماسک د سپېس اېکس شرکت دا تر ټولو ځواکمنه ستوربېړۍ چې سټارشپ نومېږي، ټاکل شوې وه د دوشنبې په ورځ د ټکساس له بوکا چیکا د ځمکې نه د فضا لور ته وتوغېږي خو دغه پلان يې له توغولو یوازې څو دقیقې مخکې لغوه شو.
نور ولولئ: ريانا لومړنۍ سعودۍ ښځه ده چې فضا ته سفر کوي
په زرګونو نندارچيان هم د مکسیکو په خلیج کې ساحلي سیمو ته ورټول شوي وو چې د دغه فضايي راکټ توغېدل وګوري.
اېلان ماسک په یوه ټویټ کې ولیکل چې ښکاري ستونزه د یوه یخ شوي ( د فشار وال) له امله رامنځته شوې وي. خو ویلي يې وو چې سپېس اېکس شاید دا ستوربېړۍ د اوونۍ په پای کې وتوغوي.
سټارشيپ د سپوږمۍ او مریخ د سپړلو او مطالعې لپاره جوړه شوې ستوربېړۍ ده چې لومړی فضا ته توغېږي او بېرته به ځمکې ته راستنېږي
سټارشپ نږدې ۱۲۰ مېتره لوړه ده او داسې ډیزاین شوې چې د هر پخواني راکټ پرتله نږدې دوه برابره زور او وړتیا لري.
مخکې له دې چې دغه توغېدل وځنډېږي، اېلان ماسک له خلکو غوښتي وو چې تمې راټيټې کړي. دا نامعموله نه ده چې دا رنګ راکټونه په خپل لومړني سفر کې له ورته ستونزو او ناکامۍ سره مخ شي.
نور ولولئ: څلور ستور مزلي فضا کې د پنځو میاشتو تېرولو وروسته ځمکې ته راکوز شول
هغه په ټویټر ليکلي: “دا د یوه خورا پېچلي، لوی راکټ لومړی توغول دي، نو شاید ونه توغېږي. موږ به ډېر احتیاط وکړو او که داسې څه ولیدل شي چې موږ اندېښمنوي نو توغېدل به يې وځنډوو.”
ایلان مسک تمه لري چې د سټارشپ په توغولو سره به فضا ته د راکټونو او ستوربېړیو کاروبار بشپړ بدل کړي
دا ستوربېړۍ داسې طراحي شوې چې په چټکۍ او بشپړ ډول د بیا کارېدو وړتیا لري. اېلن ماسک پر داسې څه فکر کوي چې خلک او ستوربېړۍ او سپوږمکۍ په ورځ کې څو ځله مدار ته لاړ او راشي، هغه ډول چې نورې عادي الوتکې الوت او سفر کوي.
نور ولولئ: د اماراتو تاریخي فضايي ماموریت پیل شو
هغه په دې لا فکر کوي چې ورته سپوږمۍ او ستوربېړۍ به د سیارو تر منځ د انسانانو د تګ راتګ لپاره د عادي موټرونو په څېر کار ورکوي.