پر جنین د اسراییلو تر برید وروسته فلسطیني کورنۍ ویجاړو او کنډوالو کورونو ته ورځي
فاتنه الغول وايي: “موږ باید تښتېدلي وو. پرته له هغه به زه او زما لوڼې وژل شوي وای.”
اغلې الغول وايي، کله چې د ښيښو ټوټو او خځلو ته ګوري نو ژړا ورځي ځکه یو وخت دا د هغې کور و.
یو بلډوزر وختي راغلی او د هغوی له کنډواله شوې کوڅې کثافات پاکوي.
هغه او د هغې د کورنۍ او ګاونډیانو نهه نورې ښځې، په اشغال شوې لویدیځې غاړې کې د جنین له کمپه وروسته له هغې وتښتېدې، چې اسراییلو هلته تر ټولو ستر عملیات پیل کړل.
د فاتنه کورنۍ یوه له هغو سلګونو کورنیو ده، چې اوس بېرته خپلو هغو کورونو ته ستنېږي چې د بې پیلوټه الوتکو بریدونو او د اسراییلي ځواکونو او وسله والو فلسطینیانو ترمنځ نښتو کې ویجاړ شوي دي.
اسراییل دا عملیات د ترهګرۍ ضد بولي
اسراییلي پوځ دا د “ترهګرۍ ضد عملیاتو” په توګه یادوي او وايي دوی په سیمه کې د وسله والو ډلو اړوند د وسلو پلورنځي او د تولید تاسیسات په نښه کړي.
خو د فلسطین د بهرنیو چارو وزارت دغه عملیات د “جنین د خلکو پر وړاندې ښکاره جګړه” بللې ده.
نور ولولئ: اسراییل وايي، په جنین کې د ایران له نیابتي وسله والو سره جګړه کوو
د دوشنبې پر سهار سلګونه اسراییلي پوځیان، چې د بې پیلوټه الوتکو لخوا یې ملاتړ کېده د جنین کډوالو کمپ ته ننوتل، چېرې چې نژدې ۲۴ زره تنه په نیم کیلومتر مربع سیمه کې اوسېږي. دوی هلته له وسله والو فلسطینیانو سره سخته جګړه پیل کړه.
د فلسطین روغتیايي چارواکو ویلي، په تېرو دوو ورځو کې د څلورو ماشومانو په ګډون ۱۲ فلسطینیان وژل شوي او تر ۱۰۰ ډېر نور ټپیان شوي دي.
د اسراییلو پوځ هم ویلي، د دوی یو سرتېری د سه شنبې پر شپه له کمپه د وتلو پر مهال مهال ووژل شو.
د وژل شویو جنګیالیو په ملاتړ ډزې هم کېدلې
د جنین کمپ ډیری اوسیدونکي د فلسطین اداره چې په لویدیځه غاړه کې د فلسطینیانو اصلي حاکمه اداره ده، تورنوي، چې د عملیاتو پر مهال یې د دوی ساتنه نه ده کړې.
خو د جنین ښاروال او د فلسطیني ادارې غړی اکرم راجوب له دې خبرو سره همغږی نه دی.
“د فلسطیني او اسراییلو ترمنځ تړونونه شته. فلسطیني ادارې تړون ته درناوی کړی، امنیتي ادارو د پوځي عملیاتو په بهیر کې له هغه څه سره سم چې د فلسطین مشرتابه غوښتنه کړې وه خپله دنده ترسره کړې.”
د فلسطین وسله والې ډلې یوه جنګیالي ویلي، اسراییلي ځواکونو د چاودېدونکو توکو یوې زېرمې په ګډون یو شمېر تاسیسات په بریالیتوب سره ویجاړ کړي دي.
