د قطر او ترکیې مشرانو په یوه لیده کې ویلي چې افغانستان کې د پراخ بنسټه حکومت د جوړېدو اړتیا ده
د قطر امیر تمیم بن حمد ال ثاني او د ترکیې ولسمشر رجب طیب اردوغان په یوه ګډه اعلامیه کې په افغانستان کې د داسې حکومت د جوړولو وړاندیز وکړ، چې د ټولو وګړو لپاره په کې ونډه ورکړل شي.
دواړو خواو په افغانستان کې د بشري حقونو پر وضعیت هم خبرې کړې او په دغه هېواد کې یې د تل پاتې سولې او امنیت پر ټینګښت ټینګار کړی.
د ستراتیژیکو اړیکو لسمه ناسته
تمیم بن حمد ال ثاني د ترکیې او قطر تر منځ د ستراتیژیکو اړیکو د کمېټې په لسمه ناسته کې د برخې اخیستو په موخه د پنجشنبې په ورځ انقرې ته تللی دی.
هغه د دغه سفر په ترڅ کې د دواړو هېوادونو تر منځ یو لړ هوکړې او تړونونه لاسلیک کړي او یوه ګډه وینا پاڼه یې هم خپره کړې ده.
نور ولولئ: د ټولګډونه حکومت په اړه د شانګهای سازمان څرګندونو ته د طالبانو غبرګون
نور ولولئ: شانګهای سازمان طالبانو ته؛ افغانستان کې ټولګډونه حکومت جوړ کړئ
په دغه وینا پاڼه کې چې د جمعې په ورځ د قطر د الانبا خبري اژانس خپره کړې، راغلي چې دواړو خواو «په افغانستان کې بشري حقونو ته د درناوي او په هغه هېواد کې د ټول ګډونه حکومت په جوړولو ټینګار کړی.»
په افغانستان کې د دایمې سولې ټینګښت
د دواړو هېوادونو مشرانو په افغانستان کې د دایمي سولې په ټینګښت کې خپلې ژمنې له سره تازه کړې.
د ترکیې ولسمشر او د قطر امیر «په افغانستان کې د بشري مرستو په همغږۍ او له هغه هېواد سره د تعامل پر اړتیا » هم ټینګار کړی.
په تېرو درېیو کالو کې، ګڼو هېوادونو او نړۍوالو بنسټونو له طالبانو غوښتي، چې پراخ بنسټه حکومت دې جوړ او د ښځو حقونو ته دې درناوی وکړي.
خو طالبانو تل خپله جوړه شوې اداره ټولګډونه بللې او په دې برخه کې یې د نړۍوالو وړاندیزونه په خپلو کورنیو چارو کې لاسوهنه ګڼلې ده.
پر دې سربېره، افغان سیاسیونو هم په وار، وار له طالبانو غوښتي چې په افغانستان کې د پراخ بنسټه حکومت جوړېدو او د مخالفو لوریو تر منځ د خبرو اترو لپاره زمینه برابره کړي، خو طالبانو تر اوسه هم دغه غوښتنې ته مثبت ځواب نه دی ویلی.
له بلې خوا پر افغانستان د طالبانو واکمن رژیم تر اوسه هم نړیوال او کورنی مشروعیت نه لري.
طالبانو پر ښځو د افغانستان په تاریخ کې بې ساري بندیزونه لګولي دي چې د کورني او نړیوال غبرګون سره مخامخ دي.
