دغه سازمان ویلي چې طالبان یا ښځینه خبریالانو ته معلومات نه ورکوي او یا یې سخته ورسره شریکوي
د افغانستان له خبریالانو د ملاتړ سازمان ۲۰۲۴ کال معلوماتو ته د لاسرسي په برخه کې د افغان ښځینه خبریالانو لپاره ننګوونکی کال بللی دی.
دغه سازمان د یو ۷ مخیز راپور په خپرولو سره ویلي، چې د افغانستان دننه ښځینه خبریالانې معلوماتو ته د لاسرسي په برخه کې له پراخو ستونزو او ننګونو سره مخامخې دي.
ریاست الوزراء دفتر او خبریالانې
په دغه راپور کې راغلي، چې د طالبانو امنیتي بنسټونه او د دغې ډلې د رياست الوزرا دفتر په سختۍ سره ښځینه خبریالانو ته معلومات ورکوي.
راپور زیاتوي: «ښځینه خبریالانو سره جنسیتي تبعيض ۳۸ سلنه او د حقایقو بربڼډولو وېره ۳۳ سلنه هغه لوی لاملونه ده، چې طالبان يې له کبله معلومات نه شريکوي.»
راپور وړاندې کاږي، چې ۵۸ سلنه ښځینه خبریالانې د معلوماتو د ردېدو په وخت کې کومې ادارې ته شکایت نه شي کولای.
نور ولولئ: طالبانو په خوست کې په راډیوګانو کې د نجونو پر ټیلیفوني اړیکو بندیز ولګاوه
نور ولولئ: طالبانو په خوست کې د «غرغښت» راډیو خپرونې بندې کړې
د راپور له مخې، ۵۸ سلنه ځواب ویونکو د رسنیو ملاتړي سازمانونه بیا بې ګټې بللي دي.
دغه خبریالانې د طالبانو لهخوا دوی ته له ورپېښېدونکو امنیتي ستونزو سر ټکوي، چې له امله یې نه شي کولای چې مالوماتو ته لاسرسی پیدا کړي.
دغه سازمان له نړۍوالې ټولنې د افغان خبریالانو د ملاتړ دوام غوښتنه کړې ده.
په رسنیو کې پر ښځو فشار
د دغه سازمان په انلاین ټولپوښتنه کې ځواب ویونکو له نړۍوالو سازمانونو غوښتي، پر طالبانو فشار راوړي چې د بیان ازادۍ ته درناوی وکړي او د دوی د کار په برخه کې ټول لګېدلي محدودیتونه لرې کړي.
دغه سازمان د ټلویزیون د نړۍوالې ورځې په مناسبت د یوې خپرپاڼې په خپرولو سره ویلي وو، چې طالبانو د پراخ سانسور په پلي کولو، د رسنیو د تړلو او د خبریالانو په ګواښلو سره د بیان ازادي او اطلاعاتو ته د لاسرسي چاپېریال ډېر محدود کړی دی.
په خبرپاڼه کې راغلي وو، ګڼ شمېر ټلوېزیوني شبکې اړ اېستل شوې چې خپل فعالیتونه ودروي او یا د طالبانو له اېډیالوژۍ سره سمې خپرونې وکړي.
خبرپاڼه زیاته کړې وه، چې د طالبانو تر واک لاندې د ټلویزوني خبریالانو په ځانګړې توګه د ښځو لپاره فضا ډېره تنګه او تیاره شوې ده.
واک ته د طالبانو له رسېدو وروسته په پراخه کچه ښځينه خبريالانې له کاره محرومې شوې او ځینې یې اړې شوې چې هېواد پرېږدي.
