له افغان خبریالانو د ملاتړ سازمان ویلي چې پاکستان باید د افغان خربریالانو ازادۍ او حقونو ته درناوی وکړي
د افغانستان له خبریالانو د ملاتړ سازمان په پاکستان کې له افغان کډوالو په ځانګړې توګه افغان خبریالانو سره د پاکستاني پولیسو د ناوړه چلند پر وړاندې غبرګون ښودلی. دغه سازمان له پاکستانه غوښتي، چې د افغان خبریالانو د حقونو او ازادۍ ساتنه وکړي.
د افغانستان له خبریالانو د ملاتړ سازمان د پاکستان له حکومته غوښتي، چې د افغان خبریالانو د حقونو او ازادۍ ساتنه وکړي، هغوی ته دې د قانوني اوسېدو امکانات برابر کړي او د خلکو له ځورونې دې ډډه وکړي.
دغه سازمان د یوې خبرپاڼې په خپرولو سره ویلي، په پاکستان کې افغان خبریالان د بېلابېلو ناقانونه پلمو له مخې نیول کېږي، ځورول کېږي او ان د ویزې د نه لرلو له امله د دغه هېواد پرېښودو ته اړ اېستل کېږي.
په خبرپاڼه کې راغلي، د پاکستان د حکومت دغه ډول کړنې د هغو خبریالانو پر وړاندې چې په بل هېواد کې د امن ژوند په تکل کډوال شوي دي؛ ستر خنډ دی.
د خبرپاڼې له مخې، د دغه ډول کړنو دوام نه یوازې د خبریالانو؛ بلکې د ټولو بشري حقونو پر وړاندې یو جدي ګواښ دی.
دغه سازمان له هغو سفارتونو چې د افغان خبریالانو د کډوالۍ او بشردوستانه ویزو قضیې مخته بیايي؛ د دوی د ویزو د ورکړې بهیر د چټکتیا غوښتنه کړې ده.
نور ولولئ: تازه؛ طالبانو درې خبریالان زندان ته اچولي دي
نور ولولئ: طالبانو په خوست کې په راډیوګانو کې د نجونو پر ټیلیفوني اړیکو بندیز ولګاوه
د افغانستان له خبریالانو د ملاتړ سازمان ویلي، چې د افغان خبریالانو وضعیت په پراخه کچه د بشري حقونو د نقض یوه ښکاره بېلګه ده او باید د دوی ملاتړ لپاره بېړني او سملاسي اقدامات وشي.
دغه سازمان له ټولو نړۍوالو سازمانونو او د بشري حقونو ملاتړو بنسټونو څخه هم غوښتي، چې د افغان خبریالانو د روان وضعیت په تړاو خپل غږ پورته کړي.
دغه اندېښنې داسې مهال راپورته کېږي، چې له تېرو څلورو ورځو راهیسې د پاکستان په پلازمېنه اسلام اباد کې د افغان کډوالو او پناه غوښتونکو ځورونې او نېونې زور اخیستی.
له بل پلوه د طالبانو د کډوالو چارو وزارت ویلي، چې د اسلام اباد پولیسو په یو لړ عملیاتو کې ۱۲۷ تنه افغانان نیولي دي.
د راپورونو له مخې، پاکستاني پولیسو د دغو عملیاتو په ترڅ کې د ښځو او ماشومانو په ګډون لسګونه افغان کډوال نیولي او بندیان کړي دي.
