امیرخان متقي په سیمه کې د داعش ډلې د مرکزونو له رامنځته کېدو اندېښنه په ډاګه کړي ده
د طالبانو د بهرنیو چارو وزیر د مسکو فارمټ غونډې ته په وینا کې وویل، داعش توانېدلی د افغانستان له پولو بهر د تجهیزاتو او روزنې مرکزونه جوړ کړي او دې پېښې طالبان اندېښمن کړي. امیرخان متقي د سیمې له هېوادونو وغوښتل چې داعش ته د خپلو وګړود استخدام اجازه ور نه کړي.
دغه طالب چارواکي ادعا کړې، چې په افغانستان کې د داعش ډېرې چاودنې بهرني اتباع کوي. هغه د سیمې له هېوادونو وغوښتل چې داعش ته اجازه ور نه کړي چې د سیمې د هېوادونو وګړي استخدام کړي او افغانستان او نورو هېوادونو ته یې د ورانکارو موخو لپاره ولېږي.
د داعش خراسان ډلې قوي کېدل
طالب چارواکو په وار وار ادعا کړې، چې داعش په افغانستان کې نشته و خو د داعش خراسان څانګه لا هم په افغانستان کې د خونړیو بریدونو پړه پر غاړه اخلي.
د طالبانو د بهرنیو چارو وزیر د یوه پلاوي په مشرۍ مسکو ته تللی او هلته یې د مسکو فارمټ په شپږمه مشورتي غونډه کې ګډون کړی دی.
که څه هم روسیه طالبان د یوې ترهګرې ډلې په توګه پیژني، خو له طالبانو سره ډیپلوماټیکې اړیکې لري.
نور ولولئ: د مسکو فارمټ غونډه کې پر طالبانو نوي فشارونه
نور ولولئ: د مسکو غونډه د لسو هېوادونو استازو د افغانستان وضعیت په اړه خبرې وکړې
د طالبانو د بهرنیو چارو وزیر د مسکو فارمټ په مشورتي غونډه کې ویلي، چې تمه لري له روسیې سره د ډیپلوماتیکو اړیکو کچه لوړه شي.
په افغانستان کې د ترهګرو ډلو شتون
د امیرخان متقي له وینا مخکې د روسیې د بهرنیو چارو وزیر سرګي لاوروف د مسکو فارمټ د مشورتي فورم په غونډه کې ویلي و چې اوس هم بېلابېلې ترهګرې ډلې په افغانستان کې شته او له دې هېواده بهر بریدونه کوي.
هغه دا هم وویل، چې له ترهګرۍ سره د مبارزې په برخه کې له افغانستان سره مرسته کول غواړي.
په همدې حال کې د روسیې د امنیتي سازمان مشر الکساندر بورتنیکوف د جمعې په ورځ په بشکیک کې د ګډو ګټو د خپلواکو هېوادونو د امنیتي او استخباراتي ادارو د مشرانو په غونډه کې له افغانستان څخه د تروریستي ګواښونو په اړه دا هم وویل چې په افغانستان کې د داعش او په دغه هېواد کې میشتو نورو جهادي ډلو سره د مبارزې لپاره دا غوره ده، چې له طالبانو سره خبرې وشي.
خو امیرخان متقي په افغانستان کې د ترهګرو ډلو شتون په اړه اندېښنې بې ځایه وبللې.
