ملا برادر وايي، دوی د خپل بهرني اقتصادي محوره سیاست په چوکاټ کې به د سیمې په ترانزیټ کې مرستندوی وي
د طالبانو د رییس الوزرا مرستیال له ازبک پلاوي سره لیدنه کې هیله وکړه، چې د شپږ اړخیز دهلېز اړوند خبرې نتیجې ته ورسېږي.
ملا برادر وايي، دا دهلیز له بیلاروس پیلېږي، له روسیې، قزاقستان، ازبکستان او افغانستان په تېرېدو سره پاکستان ته رسېږي او د سیمې هېوادونه له نوې لارې سره نښلوي.
نور ولولئ: مسکو د افغانستان اوسپنې پټلۍ کې پانګونې ته لېواله دی
ملا برادر د نن په کابل کې د ازبک چارواکو په ویاړ جوړه شوې غونډه کې وویل: «د افغانستان طرف هیله من دی چې دغه مذاکرات یوې پایلې ته ورسېږي او زموږ او ستاسې مشترکه منطقه د نوي دهلېز له لارې سره وصل شي.»
د یاد دهلیز په رامنځته کېدو اسانتیاوې رامنځته کېږي
د هغه په خبره، دې دهلیز سره به د سوداګریزو مالونو په لېږد کې ډېرې اسانتیاوې برابرې شي.
ملا برادر له ازبک چارواکو وغوښتل چې د افغانستان پر سوداګریزو توکو ګمرکي تعرفه کمه کړي او همداراز افغان سوداګرو ته د ویزو ور کړې خنډونه لري کړي.
د ازبکستان د لومړي وزیر له مرستیال جمشید خوجاوف نن د دغه هېواد د کرنې، انرژۍ، اوبو، کانونو او ترانسپورت وزیرانو په ملتیا کابل ته رسېدلی دی.
نور ولولئ: قوش تپې کانال؛ له جوړېدو سره یې ازبک چارواکي اندېښمن دي
د ملا برادر د دفتر په یوه خبرپاڼه کې وايي، د ازبکستان د لومړي وزیر مرستیال هم د دغه هېواد په ترمز ښار کې افغان سوداګرو ته د یوه لوی سوداګریز مرکز د سپارلو اعلان کړی دی.
په دې کتنه کې جمشید خواجوف وویل، هېواد یې داسې پلان لري چې له مخې به یې ازبکستان ته د افغانستان صادرات زیات شي.
د ازبکستان د لومړي وزیر مرستیال ویلي دي چې د دغه پروګرام پر بنسټ به د افغانستان او ازبکستان ترمنځ د سوداګرۍ کچه درې میلیارد ډالرو ته ورسېږي.
افغان لوري ته به د ویزو ورکولو اسانتیا برابره شي
د ملا برادر دفتر همداراز لیکلي چې ازبک پلاوی به د افغان سوداګرو او موټر چلوونکو لپاره د ویزې ورکول اسانه کړي.
د دغه دفتر د خبرپاڼې پر بنسټ، ازبک پلاوي په نږدې راتلونکي کې په تاشکند کې د افغان صنعت کارانو د تولیداتو د نندارې لپاره د نړیوال نندارتون د جوړېدو اعلان هم وکړ.
په دې ناسته کې د اورګاډي پټلۍ، ترانسپورت، په افغانستان کې د کانونو تخنیکي استخراج، د اوبو مدیریت، د کرنې پراختیا او د پوهنې د زمینې برابرول هغه نور موضوعات دي چې په دې غونډه کې تر بحث لاندې ونیول شول.
