د طالبانو د حکومت رئیس الوزرا مرستیال ښاغلی ملا عبدالغني برادر له مسلکي افغانانو غوښتي چې بهر ته د تلو پر ځای په افغانستان کې پاتې شي. ښاغلي برادر په کابل کې د طالبانو او امریکا متحدو ایالتونو تر منځ د دوحې هوکړې دویمې کلیزې په مناسبت یوې غونډې ته وینا کې پر ځوان کول غږ وکړ، چې د تکنالوژۍ زدکړې وکړي او د نورو پر ځای د خپل هېواد لپاره کار وکړي. ښاغلي زیاته کړه: پر پوهو او مسلکي هېوادوالو غږ کوم، چې هېواد دې نه پرېږدي او د نورو هېوادونو پر ځای دې د خپل هېواد افغانستان ابادولو لپاره په هېواد کې پاتې شي. ”
د طالبانو رئیس الوزرا یوه بل مرستیال مولوي عبدالسلام حنفي د دوحې هوکړې دویمې کلیزې په مناسبت وویل، طالبان د دې هوکړې هغې برخې ته ژمن دي، چې وايي، د افغانستان خاوره به د نورو پر ضد نه کارول کېږي. نوموړي زیاته کړه: ”موږ په عین حال کې له نورو هم د دوحې هوکړې عملي کولو غوښتنه کوو. ” طالبانو په دې مناسبت یوه اعلامیه کې له نړیوالې ټولنې غوښتي چې ”ښې او نیکې دروازې د افغانانو لپاره پرانیزي، چې د ټولو احتمالي ګواښونو مخنیوی وشي. ”
نور یی ولوله | طالبان: نړیوالې ټولنې د ټولګډونه حکومت د جوړېدو لپاره د ۱۵کسانو نوملړ راسپارلی
په دې اعلامیه کې له یو شمېر هېوادونو چې ”اشغالګر ” بلل شوي غوښتل شوي، چې له دې وروسته باید د متقابل درناوي پر بنسټ تعامل وکړي. د یادونې ده، چې له دې مخکې وړمه ورځ د طالبانو ویاند ذبیح الله مجاهد هم ویلي و چې افغانان دې له ‘عذر ‘ پرته بهر ته سفر نه کوي. نوموړي همدا راز ویلي و، هغه افغانان چې له کوم عذر پرته غواړي بهرنیو هېوادونو ته سفر وکړي، مخه به یې نیول کېږي.
اوس ښاغلي مجاهد په یوه تازه ټویټر پیغام کې د مخکینو څرګندونو وضاحت په توګه ویلي، د خبرې هدف یې یوازې په غیر قانوني توګه بهر ته د تلونکو افغانانو ممنوعیت و. په داسې حال کې چې له نژدې شپږ میاشتو راهیسې، چې په افغانستان کې طالبان واکمن شوي، زرګونه لوستي او مسلکي افغانان له هېواده وتلي دي او یا د وتلو په حال کې دي، د طالبانو رئیس الوزار مرستیال وايي: ”که مسلکي کسان په هېواد کې پاتې شي، هم به یې عزت خوندي وي، هم به له محتاجۍ خلاص وي او هم به یې له خپل هېواد سره مرسته کړې وي. ” له افغانستانه لسګونه زره کسان ایستل شوي دي، ځینې بیا خپله بهر ته تللي، خو لا هم داسې باور شته چې زرګونه نور غواړي له هېواده بهر ته لاړ شي.
