د ملګرو ملتونو اداره اوچا وايي چې د طالبانو زیاتو تګلارو په افغانستان کې د بشري مرستو رسول اغېزمن کړي دي

د ملګرو ملتونو د بشري مرستو د همغږۍ اداره (اوچا) په خپل تازه راپور کې ويلي، چې واک ته د طالبانو له رسېدو وروسته دغې ډلې ۳۹۲ داسې تګلارې پلې کړې چې بشري مرستې او فعالیتونه یې اغېزمن کړي دي.

د دغه بنسټ په وروستي راپور کې راغلي، د دغو تګلارو څخه تر ۷۰ زیات یې داسې دي چې د بشري مرستو په رسولو کې یې د مېرمنو برخې اخیستنه زیانمنه کړې ده.

د افغان مېرمنو پرضد تګلارې

د اوچا په راپور کې راغلي، چې طالبانو یوازې په ۲۰۲۴ کال کې نږدې ۱۰۰ داسې تګلارې تصویب کړې چې له ډلې یې شپږ تګلارې یوازې د مېرمنو د کار کولو په اړه دي.

اوچا وايي، په دغو تګلارو کې د حجاب مراعتول، له محرم پرته کار ځای ته تګ راتګ، په ساحه کې د مېرمنو پر کار د بندیز لګول او په دولتي ادارو کې د هغوی د معاشونو کمېدل شامل دي.

اوچا: افغانانو ته غوښتل شوي بشري مرستې یوازې شپږسلنه راټولې شوي

دغه بنسټ دا رنګه ویلي، د طالبانو د امر بالمعروف قانون پر مېرمنو لګېدلي بندیزونه لا پیاوړي کړي چې په دې کار سره د بشري مرستو د رسولو بهیر ټکنی شوی دی.

نور ولولئ: په افغانستان کې بې وزلي؛ اوچا وايي، ۲۳.۷ میلیونه افغانان بشري مرستو ته اړتیا لري

نور ولولئ: اوچا: د سیلاب ځپلو د وضعیت د ارزولو لپاره ۱۴ ګډ ټیمونه رامنځته شوي

د اوچا د راپور په یوه بله برخه کې راغلي، چې دمګړۍ د بودجې د کموالي له امله په افغانستان کې ۳.۷ مېلیونه خلک له لومړنیو خدمتونو بې برخې شوي چې په دوی کې د روغتیايي خدمتونو څخه نیولې بیا د نورو ټولنیزو خدمتونو په برخو کې خلک له دایمي ملاتړه بې برخې شوي دي.

له بشري مرستو د خلکو بې برخې کېدل

د اوچا په خبره، له مالي ملاتړ پرته د افغانستان په ډېرو لرو پرتو ولسوالیو او کلیو بانډو کې به اړمن خلک له بشري مرستو بې برخې پاتې شي.

اوچا په ۲۰۲۴ کال کې د افغانستان د اړمنو خلکو شمېر ۲۳.۷ مېلیونه یاد کړی او ویلي یې دي، چې له دې ډلې ۱۷ مېلیونه یې داسې دي چې د مرستو رسولو په برخه کې لومړیتوب لري.

د ملګرو ملتونو دغه اداره وايي، د دغو کسانو د لاسنیوي لپاره یې د ۳.۰۶ میلیارډ ‌الرو بودجې غوښتنه کړې وه چې دا مهال یوازې دوی ۳۱.۴ سلنه یې تر لاسه کړې ده.

دا په داسې حال کې ده چې طالبانو پر افغان ښځو د کار کولو او زده کړو بندیز هم لګولی دی.