د ملګرو ملتونو کارپوهان وايي، د ښځو پر وړاندې د طالبانو سیاستونه د نسل وژنې په مانا دي
د ملګرو ملتونو کارپوهانو د دوشنبې په ورځ په یوې خبرپاڼه کې ویلي، چې په طبي برخو کې د نجونو پر زده کړو بندیزونه د غیر ضروري پرېشانۍ، ناروغۍ او د احتمالي مرګ لامل کېږي. د دوی په خبره: «دغه بندیزونه د ښځو د نسل وژنې په مانا دي.»
د ملګرو ملتونو کارپوهان دغه څرګندونې په داسې حال کې کوي، چې د طالبانو مشر په دې وروستیو کې د ښځو او نجونو پروړاندې د طبي مرکزونو دروازې وتړلې.
د طالبانو دغه پرېکړه له پراخو نړۍوالو غبرګونونو سره مخ شوې ده.
د ښځو د روغتیا لپاره خطرناک اقدام
د بشري حقونو یو شمېر نورو سازمانونو هم د طالبانو دغه اقدام د ښځو د روغتیا لپاره خطرناک بللی دی.
د ملګرو ملتونو ځانګړو راپور ورکوونکو او همداراز کارپوهانو له دې اقدام څخه د اندېښنې په څرګندولو سره خبرداری ورکړی، چې د دې پرېکړې په اجرا کېدو سره به د افغانستان ښځو ته نه جبرانیدونکې ضربه ورسیږي.
نور ولولئ: د کاناډا لومړی وزیر: پر افغان ښځو د طالبانو بندیزونه له وحشته ډک دي
نور ولولئ: شنبههای ارغواني غورځنګ: د طالبانو تر حاکمیت لاندې د افغان مېرمنو مسئله نړیوال ناورین دی
د ملګرو ملتونو کارپوهانو ټينګار کوي، چې دغه ممنوعیت به د افغان ښځو، ماشومانو او راتلونکو نسلونو د احتمالي مرګ، ناروغیو، او د پرېشانۍ لامل شي.
دوی د طالبانو وروستی اقدام د ښځو پر حقونو مستقیم برید بولي او وایي: «که دغه بندیز پلي شي دا به د افغان ښځو او نجونو سلامت، کرامت او راتلونکي ته د نه جبران وړ ضربه ورسوي.»
د ښځو لومړني حقونه تلف کول
پر افغانستان د طالبانو له بیا واکمنېدو سره دغې ډلې په سیستماتیک ډول د ښځو د زده کړو او کار په ګډون د هغوی لسګونه لومړني حقونه تر پښو لاندې کړي دي.
کارپوهانو ټينګار کړی: «په افغانستان کې د ښځو او ماشومانو روغتیا په بحراني وضعیت کې ده او د میندو او نویو زېږیدونکو ماشومانو د مړینې کچه هم لوړه ده، د دې بندیز پلي کېدل به دغه ناورین نور هم ورپسې زیات کړي او اوږدمهاله اغېزې به ولري.»
د ملګرو ملتونو کارپوهانو له طالبانو غوښتي، چې دغه پرېکړه ژر تر ژره لغوه کړي.
دوی وایي: «نړۍ باید له افغان ښځو او نجونو سره متحد شي، ترڅو د دوی اساسي حقونه وساتل شي او طالبانو د خپلو کړنو له امله ځواب ویلو ته اړ شي.»
