ننګرهار کې وروستي سیلابونه سلګونو کورونو او زرګونو کورنیو ته درانه مالي او بشري زیانونه اړولي دي. د کډوالۍ نړیوال سازمان ویلي، د دغو سېلونو له امله یوازې په ننګرهار ولایت کې شاوخوا دوه زره کورنۍ اغېزمنې شوې دي.
د یاد سازمان په وینا، ناڅاپي سېلونو خلک له خپلو کورونو بېځایه کړي، کرنیزې ځمکې او د خلکو د عاید سرچینې یې زیانمنې کړې او ګڼې کورنۍ یې له سختو ستونزو سره مخ کړې دي.
ننګرهار کې وروستي سیلابونه، د ننګرهار په شیرزادو ولسوالۍ کې تر ټولو ډېر زیانونه
د کډوالۍ نړیوال سازمان په خپره کړې خبرپاڼه کې ویلي، د ننګرهار د شیرزادو ولسوالۍ اوسېدونکو ته تر ټولو ډېر زیان اوښتی او ډېری سېلځپلې کورنۍ لا هم بېړنیو بشري مرستو ته اړتیا لري.
دغه سازمان ویلي چې په ننګرهار، کونړ او لغمان ولایتونو کې د مرستو لړۍ روانه ده، خو لا هم ګڼې کورنۍ د سرپناه، خوراکي توکو او روغتیايي خدمتونو له کمښت سره مخ دي.
تر دې وړاندې هم نړیوالو مرستندویو بنسټونو ویلي وو چې په افغانستان کې وروستیو سېلونو لسګونه زره کسان اغېزمن کړي او ګڼ کورونه یې ویجاړ کړي دي.
ننګرهار کې وروستي سیلابونه، اوچا: وروستیو سېلونو بشري وضعیت نور هم سخت کړی
په همدې حال کې، د ملګرو ملتونو د بشري چارو د همغږۍ دفتر یا اوچا خبرداری ورکړی چې وروستیو بارانونو او سېلونو د افغانستان بشري وضعیت لا پسې خراب کړی دی.
د اوچا په وینا، که څه هم مرستندویه ادارې هڅه کوي سېلځپلو سیمو ته بېړنۍ مرستې ورسوي، خو د لارو خرابوالی او ځینې تخنیکي ستونزې د مرستو بهیر له خنډونو سره مخ کړی دی.
د یادونې وړ ده چې ننګرهار کې وروستي سیلارونه داسې مهال رامنځته کېږي چې د هېواد ګڼې سیمې لا هم د اقلیمي بدلون، وچکالۍ او اقتصادي ستونزو له اغېزو کړېږي.
