د طالبانو، القاعده او د ټي ټي پي تر منځ د همکارۍ پر زیاتېدو د ملګرو ملتونو امنیت شورا اندېښنه ښوولي ده
دغه اندېښنې په داسې حال کې رابرسېره کېږي چې پاکستان کې د تحریک طالبان پاکستان او نورو ډلو بریدونه زیات شوي او ورځ تر بلې امنیتي حالت خرابېږي.
امنیت شورا ویلي، دغې ډلې د «پاکستان تحریک جهاد» تر چتر لاندې په افغانستان کې د بشري سرچینو او روزنیزو کمپونو په ګډو مرکزونو وژونکي بریدونه کړي دي.
پاکستان د ترهګرو ډلو د چتر په توګه
د ملګرو ملتونو د امنیت شورا په نوي راپور کې د القاعدې، افغان طالبانو او ټي ټي پي تر منځ اړیکو ته په اشارې لیکلي دي چې پاکستاني طالبان د نورو ترهګرو ډلو لپاره د یوه پراخ چتر په توګه د بدلېدو په حال کې دی.
په راپور کې ویل شوي چې د هند په نیمه وچه کې د پاکستاني طالبانو او القاعدې احتمالي یوځای کېدل به د پاکستان، هند، میانمار او بنګله دېش پر وړاندې ګواښونه لا پسې زیات کړي.
د راپور له مخې، د امنیت شورا دوو غړو د بلوچستان په تربت سیمه کې د ګوادر پر بندر او د سمندري هوايي ځواکونو په اډه «بلوڅ بیلتون پالو» پورې اړوند د «مجید لېوا» بریدونه له پاکستانه د بهرنیو پانګهوالو د بشپړو وتلو په موخه د خبرداری په توګه تعبیر کړل.
نور ولولئ: د افغانستان په تړاو د دوحې غونډې ته د حامد کرزي ګونګ پیغام
نور ولولئ: طالبان د دوحې ناستې له اجنډا خبر نه لري
د امنیت شورا یوه غړي هیواد راپور ورکړی چې القاعده د پاکستاني طالبانو او «مجید بريګېډ» ترمنځ همکارۍ ته لاره هواره کړې ده.
پاکستان کې د نورو بریدونو احتمال
د شورا یوه بل غړي اندېښنه څرګنده کړه چې د پاکستاني طالبانو، «مجید لېوا» او په افغانستان کې د داعش د خراسان څانګې تر منځ هر ډول اړیکه کیدای شي د پاکستان په بلوچستان او سند صوبو کې بریدونه زیات کړي.
دغې شورا ویلي، القاعده هڅه کوي چې په سیمه کې د اغېز ډېرولو لپاره له غیر افغاني ترهګرو ډلو په ځانګړې توګه له پاکستاني طالبانو سره همکاري پیاوړې کړي.
د ملګرو ملتونو امنیت شورا دا هم ویلي چې په بهر کې د پراخو عملیاتو لپاره د وړتیا له نشتوالي سره سره، القاعده هڅه کوي چې د غیر افغاني سیمه ییزو ترهګرو سازمانونو لکه د ازبکستان اسلامي غورځنګ، جماعت الانصار او پاکستاني طالبانو سره همکاري پیاوړې کړي.
د ملګرو ملتونو د امنیت شورا د بندیزونو کمیټې په یوه نوي راپور کې خبرداری ورکړی چې د القاعدې د مهارولو لپاره د طالبانو له هڅو سره سره، له پاکستاني طالبانو سره د القاعدې نوره همکاري کولای شي ټي ټي پي په یوه سیمه ییز ګواښ بدل کړي.
د ملګرو ملتونو امنیت شورا افغانستان ته د القاعدې د ځینو قوماندانانو د سفرونو په اړه خبر ورکړی دی. په راپور کې ویل شوي چې القاعده په پټه توګه په افغانستان کې د بریدونو تنظیمولو او د ځواکونو روزنې ته دوام ورکوي.
د دغه راپور له مخې، د القاعدې قوماندانان په ټولیز ډول له منځني ختیځ څخه د مشهد، زابل، نیمروز، اسلام کلا، تورغونډۍ او هرات د زرنج له لارې تګ راتګ کوي.
په راپور کې ویل شوي، چې د امنیت شورا څو هېوادونو کونړ او نورستان ته د القاعدې د هغو عربو قوماندانانو، چې پخوا په افغانستان کې فعال وو او له طالبانو سره یې تاریخي اړیکې لرلې، د راتګ خبر ورکړی دی.
