نړیوال بانک په تازه راپور کې وايي، د افغانستان اقتصاد ۲۵ سلنې تر وړې ټېټې کچې ته رالوېدلی دی
نړیوال بانک وايي، د افغانستان اقتصاد مخ په ښه کېدو نه دی، بلکې د ځوړ خواته روان دی.
نړیوال بانک «د اقتصادي بدلونونو او مهمو ننګونو » په نوم نوي راپور کې ویلي، چې د افغانستان اقتصاد د “ثبات” ټیټې کچې ته رسېدلی دی.
نړبوال بانک په خپل دغه راپور کې زیاته کړې، چې د افغانستان اقتصاد ۲۵ سلنه کم شوی او د نړیوالو مرستو ترڅنګ د بهرنۍ پانګونې راجلبولو ته اړتیا لري.
د وارداتو د کچې زیاتېدل
د راپور له مخې، د افغانستان اقتصاد له ۲۰۲۰ کال راهیسې تر اوسه له ۲۷ سلنې انقباض څخه نه دی ښه شوی.
په راپور کې راغلي، چې د افغانستان صادرات د تېر کال د جنورۍ په پرتله ۵ سلنه کم شوي او ۱۴۰،۵ میلیونه ډالرو ته ټیټ شوي دي، خو په همدې موده کې بیا د وارداتو کچه ۳۷ سلنه زیاته شوې ده چې څه باندې ۸۰۰ میلیون ډالرو ته رسېږي.
نور ولولئ: نړیوال بانک په افغانستان کې د کاسا-۱۰۰۰ پروژې د بیا پیل لپاره ۳۰۰ میلیون ډالر ځانګړي کوي
نور ولولئ: د نړیوال بانک په مرسته راتلونکې میاشت د کاسا۱۰۰۰ پروژې کار پیلېږي
د نړیوال بانک د اټکل له مخې، افغانستان د وارداتو له اړخه باید په کال کې ۵،۵ میلیارد ډالره ترلاسه کړي وای، خو په راپور کې د سوداګرۍ کسر ۳،۵ میلیارده ډالره ښيي.
د بانکدارۍ محدودیتونه، د سوداګرۍ او ټرانزیت پر وړاندې خنډونه، د دولتي بنسټونو انزوا او د هېواد د صنعت او کرنې په برخو کې د بهرنۍ پانګونې نشتوالی هغه لاملونه دي چې د افغانستان د اقتصادي ودې مخه یې نېولې ده.
له ټاکلي هدف لږ عاید تر لاسه کېدل
د نړیوال بانک د راپور له مخې، په تېر مالي کال کې ۱۸۹ میلیارده افغانۍ ترلاسه شوې دي چې له ټاکلي هدف کمې دی.
په راپور کې په افغانستان کې د بې وزلۍ زیاتوالي ته په اشارې سره ویل شوي، چې ۲۰ میلیونه وګړي بې وزله او ۱۵،۳ میلیونه وګړي د خوراکي توکو له کمښت سره مخ دي.
د راپور په یوه بله برخه کې بیا د اقلیم بدلون، د ښځو او ځوانانو وزګارتیا او د پاکستان او ایران په ګډون د سیمې له هېوادونو د کډوالو جبري اېستل د افغانستان پروړاندې له جدي اقتصادي ننګونو بلل شوي دي.
د یادونې وړ ده چې طالبان د خپلې مالي تګلارې ستاینه کوي، خو په واقعیت کې داسې ښوول کېږي چې د افغانستان اقتصاد ښکته روان دی او په هېواد کې د ورځې په تېرېدو بې روزګاري زیاتېږي.
