نیو زیلنډۍ خبریاله وایې چې خپل هېواد ته نشوم ستنېدلی؛ له طالبانو مې د کومک غوښتنه وکړه
وروسته هغه چې میندوارې نیوزیلنډۍ خبریالې چارلېټ بېلز وویل چې هېواد ته د نه پرېښودلو له امله اړه شوه چې له طالبانو نه مرسته وغواړي د نیوزیلنډ حکومت د پولو د کنترول په اړه له خپلې تګلارې دفاع وکړه. د کورونا د مخنیوي په چارو کې د حکومت وزیر کریس هپکنس ویلي ”هېواد ته د بېرته ستنېدو په اړه تګلارې په نیوزیلنډې کې ښې پایلې لرلې، د خلکو ژوند یې ژغورلی، د ناروغۍ د خپرېدو مخه یې نیولې او پر روغتیايي سیستم یې فشار کم کړی دی. ”
ښاغلی هپکنس وايي په هېواد کې د لګول شویو سختو محدودیتونو سره سره د چارلېټ بېلز په څېر کسانو لپاره چې ځانګړي شرایط لري د نرمښت ځای شته. نوموړي ویلي چارواکو آغلې بېلز ته لارښونه کړې چې د بېړني حالت په کټګوري کې یو ځل بیا د ویزې لپاره عریضه وکړي. د نیوزیلنډ هارالډ ورځپاڼې ته په یوه مطلب کې اغلې بېلز ویلي تېره اونۍ د نیوزیلنډ حکومت کور ته د ستنېدنې په اړه د هغې عریضه رد کړه.
نوموړې چې میندواره ده وايي غواړي چې نیوزیلنډ ته د خپل ماشوم د زېږولو لپاره ستنه شي. چارلېټ بېلز ویلي له هغه مهال راهیسې چې نوموړې هڅه کوي هېواد ته ستنه شي خو د محدودیتونه له امله نه شي کولای یوه بل هېواد هم ورته د پناه ورکولو وړاندیز کړی دی. آغلې بېلز واده نه دی کړی او تېرکال له خپل بیلجمي ملګري سره چې فوټو ژورنالیست دی افغانستان ته د امریکايي ځواکونو د وتلو په اړه رپوټونو چمتو کولو په خاطر ورغلې وه.
نور یی ولوله | افغانستان کې دولتي پوهنتونونه راتلونکې اوونۍ بېرته پرانیستل کېږي
هغه له خپل ملګري سره بیلجیم ته تللې وه خو هلته له څو اونیو تېرولو وروسته ځکه له طالبانو نه د مرستې غوښتنه وکړه چې تر ډېرې مودې پورې د ویزې نه لرلو له امله بیلجم کې نه شوه پاتې کېدای. چارلېټ بېلز وايي له طالبانو نه یې غوښتنه کړې وه چې آیا کولای شي بېرته افغانستان ته ستنه شي؟
هغه وايي ”طالب چارواکو زما دې غوښتنې ته مثبت ځواب راکړ او راته یې وویل چې کولای شم بېرته افغانستان ته ستنه شم او که له کومې ستونزې سره مخامخه شوم نو هغوی ته احوال ورکړم. په ورته وخت کې یو شمېر کسانو د طالبانو لخوا هغې ته د ځای ورکولو په اړه نیوکه کړې او وايي په داسې حال کې چې ډېر ځله افغان خبریالان د طالبانو لخوا ګواښل کېږي، وهل کېږي او ان وژل کېږي طالبان بهرنیو خبریالانو ته هرکلی وايي او له هغوی سره نرم چلن کوي.
