د هند ستره محکمه وايي چې د اسلامي ښوونځیو د بندولو حکم یې ځنډولی دی
په دې وروستیو د هند دولت هڅه کوي چې په دغه هېواد کې د مسلمانانو فعالیتونه، زده کړې او نور حقونه محدود کړي.
تازه د هند سترې محکمې ګڼ نفوسه ایالت اترپردیش کې د اسلامي ښوونځیو د بندولو حکم ځنډولی او مسلمانانو ته یې د زده کړو چانس غځولی دی.
د هند سترې محکمې د یوې ایالتي محکمې له خوا د دغه هیواد په ترټولو ډیر نفوس لرونکي ایالت اترپردیش کې په اسلامي ښوونځیو لګیدلی بندیز، ځڼډولی دی. د محکمې دغه نوي حکم له ډیرو لانجو وروسته د دغو ښوونځیو زده کوونکو او ښوونکو ته د ارامې ساه د اخیستو فرصت ورکړی دی.
دغه پرېکړه کله خپره شوې ده؟
د سترې محکمې دغه نوې پریکړې په دغه قضیه کې د ښکیلو وکیلانو له خوا د جمعې په ورځ خپره شوې ده. دا پریکړه په هند کې له ټاکنو څو ورځې وړاندې شوې. د هند اوسنۍ لومړی وزیر نریندرا مودي غواړي چې په دغو ټاکنو کې د دریم ځل لپاره واک ترلاسه کړي.
نور ولولئ: د افغانستان هېرویین او تریاک لېږدونکې ډرون له پاکستان د هند پولو ته رسېدلي
نور ولولئ: د هند لومړی وزیر: کشمیر د هند له خاورې سره په مدغم کېدو دی
د هند سترې محکمې، د الله اباد ایالتي سترې محکمې له خوا د مدرسو د بندلو په اړه د مارچ په ۲۲ مه نیټې صادر شوی حکم ننګولی دی. په دغه حکم کې یادې ایالتې محکمې هغه قانون لغوه کړې چې په ۲۰۰۴ کال کې تصویب شوی و او په اترپردیش ایالت کې یې د مدرسو فعالیت ته اجازه ورکوله. په دغه ایالت کې د ۲۴۰ میلیونه نفوس پنځمه برخه مسلمانان جوړوي.
د پخوا په څېر د هر څه پاتې کېدل
د اترپردیش ایالت سترې محکمې دغه قانون د سیکولریزم څخه سرغړونه بولي، هغه څه چې د هند په اساسي قانون کې راغلي دي. دغې ایالتې محکمې لارښوونه کړې وه چې د دې مدرسو زده کونکي دې دودیزو ښوونځیو ته ولیږدول شي.
د دغې قضیې اړوندو وکیلانو ویلي، چې یاده قضیه به د جولای په میاشت کې د محکمې له خوا واوریدل شي، او تر هغه وخته پورې به “هرڅه د پخوا په څیر پاتې شي.”
د هند د فدرالي انتخاباتو پروسه به د جون په میاشت کې پای ته ورسیږي.
په اترپردیش ایالت کې د مدرسو د بورډ مشر، د محکمې د حکم هرکلی کړی او هغه یې “لویه بریا” بللې.
هغه وویل: “موږ واقعیا د شاوخوا ۱.۶ میلیونه زده کونکو راتلونکي په اړه اندیښمن یو او اوس دا امر زموږ ټولو لپاره د لویې ارامۍ سبب.”
د مودي ګوند بي جي پي د مودي د صدراعظمۍ په لس کلنه دوره کې هڅه کړه چې هند کې مسلمانان او ددوی فعالیتونه رامحدود کړي.
