هیدر بار د افغان ښځو د حقونو په برخه کې پر ملګرو ملتونو او نورو سازمانونو په نیوکې سره وايي، دوی افغان ښځې له پامه غورځولي دي

هاخوا د شنبه‌های ارغواني او د افغان مېرمنو نور بنسټونه هم د دوحې په دریمه غونډه چې د ملګرو ملتونو تر مشرۍ لاندې جوړېږي، کلکې نیوکې کوي او د نه ګډون پرېکون یې هم اعلان کړی دی.

د بشري حقونو د څار سازمان د ښځو د برخې مرستیالې هېدر بار د دوحې په ناسته کې د مېرمنو د نه وربللو له امله د ملګرو ملتونو پر چلند نیوکه وکړه.

د افغان مېرمنو پر وړاندې د ملګرو ملتونو منفي دریځ

هغې وویل، چې ملګري ملتونه طالبانو ته سوال زارۍ کوي؛ خو د مېرمنو غوښتنو ته بیا منفي ځواب ورکوي.

مېرمن بار د پنجشنبې په ورځ (د چنګاښ په ۷مه نېټه) په خپلې اېکس پاڼه لیکلي، چې ملګرو ملتونو د افغان مېرمنو د حقونو د فعالانو پر وړاندې منفي دریځ خپل کړی دی.

هغې لیکلي، چې ملګري ملتونو د ښځو د حقونو فعالانو ته وايي چې «تاسې دغې غونډې [د دوحې درېیمې ناستې ته] نه شئ راتللای. راتلونکې ناسته هم ډېره ښه نه ښکاري. موږ پر مهمو مسلو خبرې کوو او د مېرمنو پر مسلو سره نه غږېږو.»

نور ولولئ:  راتلونکې اوونۍ په کابل کې د سیمه‌ییزو هېوادونو غونډه

نور ولولئ: ملګري ملتونه: د دوحې ۳مه ناسته به د افغان ښځو حقونه څرګند کړي

نور ولولئ: نصیر احمد فایق د دوحې ۳مه ناسته کې د افغان مېرمنو د ګډون غوښتنه وکړه

په پام کې ده، چې د دوحې درېیمه ناسته تر راتلونکو دوو ورځو د ملګرو ملتونو د سرمنشي د مرستیالې رزماری ډیکارلو په کوربه‌توب په دوحه کې پیل شي.

ملګرو ملتونو د دې لپاره چې طالبان دغې غونډې ته راوبولي، د افغان مېرمنو د استازو او د هغوی د بشري حقونو پر سر له خبرو اترو ډډه کړې او پر هغو یې سترګې پټې کړې دي.

ملګري ملتونه او د افغانستان مدني ټولنې

ملګرو ملتونو ویلي، چې د غونډې په دویمه ورځ به د افغانستان د مدني ټولنې او د مېرمنو له استازو سره هم وګوري.

د بشري حقونو فعالې زبیدې اکبر ویلي، چې د ملګرو ملتونو له‌خوا یې د دوحې په ناسته کې د ګډون لپاره بلنلیک تر لاسه کړی؛ خو هغه نه غواړي دغې ناستې ته ولاړه شي.

مېرمن اکبر وویل، د ملګرو ملتونو هغې پرېکړې خواشینې کړې چې د خبرو اترو له اصلي بهیره یې مېرمنې اېستې دي.

هغې دا رنګه ویلي، چې د دوحې ناسته پرته له دې چې طالبانو ته امتیاز ورکړي بله پایله نه شي لرلای.

د یادونې وړ ده چې زبیده اکبر او نورو افغان مېرمنو او بنسټونو د دوحې په دریمه غونډه کې د نه ګډون پرېکړه کړې ده.

دوی پر ملګرو ملتونو نیوکه کوي چې د طالبانو رژیم ته چې په کور دننه او باندې مشروعیت نه لري، له نړۍ سره د تعامل زمینه برابروي.