پاکستان ته د چین د مرستیال لومړي وزیر د سفر موخې څه کېدای شي؟
![291306060974408](https://afghannow.net/wp-content/uploads/2023/07/291306060974408-348x196.jpg)
پاکستان ته د چین د مرستیال لومړي وزیر د سفر موخې اقتصادي اړیکې او ستراتیژیکې همکارۍ دي
د پاکستان د بهرنیو چارو وزارت وايي، ددغه هېواد په بلنه د چین مرستیال لومړی وزیر اسلام اباد ته په دوه ورځني سفر ورځي چې د “سي پېک” د لسمې کلیزې په دستوره کې به ګډون وکړي او د چین- پاکستان پر اقتصادي اړیکو او ستراتیژیکې همکارۍ به خبرې وکړي.
پاکستان ته د چین د صدر اعظم د مرستیال او کمونیست ګوند د مرکزي کمېتې د غړي هي لیفینګ د سفر به د اګسټ تر لومړۍ نېټې دوام وکړي. په دې سفر کې له دغه جګپوړي چینايي چارواکي سره یوه چینایي ډله هم ملګرې ده.
نور ولولئ: د پاکستان د پوځ لوی درستیز چین ته د اړیکو قوي کولو لپاره تللی
د پاکستان د بهرنیو چارو وزارت وايي، ښاغلی لیفینګ به د پاکستان او چین ترمنځ د اقتصادي دهلېز (سې پېک) د لسمې کلیزې په دستوره کې هم ګډون او د پاکستان له لومړي وزیر شهباز شریف او نورو جګپوړو حکومتي چارواکو سره به لیده کاته ولري.
سي پېک یوه مهمه پروژه ده
ښاغلي لیفینګ د نړیوالو اقتصادي اړیکو او د یو کمربند او یوې لارې د نوښت په پلي کولو کې مهم رول لوبولی چې سي پېک یې یوه مهمه پروژه ده.
سي پېک د چین-پاکستان په ګډه همکارۍ د پاکستان سوېل لوېدیځ ګوادر بندر او د چین د شمال لویدېځې سیمې سنکیانګ ترمنځ د یوې لویې سوداګریزې لارې د جوړولو لپاره پیل شوې ده.
اسلام اباد کې د دغه چینايي چارواکي او د سي پېک د غونډې لپاره د دوشنبې او سې شنبې په ورځو ټول ښوونځي، کالجونه، پوهنتونونه، شخصي شرکتونه، بازارونه او سوداګریز بانکونه رخصت شوي.
له پاکستان سره د چین اقتصادي همکاري
وړاندې چین د هغو هېوادونو په نوملړ کې و، چې د پاکستان مرکزي بانک کې یې د پام وړ پیسو زېرمه کولو او میلیاردونو ډالرو پور په ورکولو د پاکستان اقتصاد له مخ ځوړ حالته وژغوره.
د دغه چینايي چارواکي د سفر لپاره اسلام اباد کې ټینک امنیت نیول شوی او پر تګ-راتګ ځینې ځایونو کې بندیز لګول شوی.
نور ولولئ: د چین بهرنیو چارو وزیر له دندې ګوښه کړای شو
چین په تېرو لسو کلونو کې له پاکستان سره پر اقتصادي پروژو میلیاردونه ډالره پانګونه کړې، چې ډېره برخه یې د انرژۍ او زېربناوو پر جوړولو متمرکزه وه.
دا په داسې حال کې ده چې پاکستان له بد اقتصادي وضعیت سره مخامخ دی او دننه په کې د خلکو بې کاري اوج ته رسېدلي ده.